تكبير الخط تصغير الخط

طبعا أنا اول مرة اشوف رئيس بيصدر "قوانين"!! بس عادي يعني، آهي مواقع وجرايد هبلة ورزق الهبل على المجانين. ويبدو إن اللي ماسك ملف الإعلام مصمم على توريط الرئيس في كل شيء، من شقق الزمالك لغاية "إصدار القوانين".. خلينا في المهم...

طالما سيادة الرئيس "أصدر قانون" عزل الموظفين متعاطي المخدرات، يا ريت سيادته "يصدر لنا قانون" عزل الموظفين تجار المخدرات، والموظفين مهربي المخدرات، والموظفين مصنعي المخدرات، والموظفين المغمضين عن مصنعي ومهربي وتجار المخدرات، والموظفين المشاركين لتجار ومصنعي ومهربي المخدرات... 

كما نرجو من وسائل الإعلام التي تحشر الرئيس في شقق الزمالك وفي تجارة المخدرات وسن القوانين وإصدارها وسكها بالخاتم السليماني إنها تسأل الرئيس عشان "يصدر لنا قانون" يقول لنا فيه، هو أسند تجارة المخدرات وتعاطيها لمين غير الموظفين اللي هايعزلهم إن شااااااااء الله... 

طبعا أكيد سيادة الرئيس المهتم بصحة الموظفين، عارف إن الشعب المصري كله بيتعاطى المخدرات بطرق وأساليب مختلفة، ما عدا خمستاشر أو عشرين شخص بيشربوا بيرة في السر. وأكيد سيادته، طالما بقى بيسن قوانين، عارف إيه اللي حصل في أمريكا لما عملوا الإجراءات التقييدية على الكحول في تلاتينيات القرن العشرين.. واكيد سيادته عارف إيه اللي حصل في الاتحاد السوفيتي لما عملوا إجراءات تقييدية على الفودكا في عهد جورباتشوف في نهاية تمانينيات القرن العشرين!!! 

أنا عارف إن النقطة الأخيرة هاتستفز المواشي وحمير الزرايب، وأكيد عقلهم الزرايبي الفذ هايصور لهم إني بادعو لإباحة المخدرات، ويمكن كمان إباحة السكر والعربدة والدعارة ولعب الميسر وتجارة العبيد والتحرش... 

وفي النهاية، يا ريت السيد الرئيس اللي بيسن القوانين يعمل لنا مذكرة تفسيرية بكلمة "الموظفين"! يعني أي موظفين، وأنهي موظفين، وافسر موظفين، ولا المقصود بيها كل الموظفين اللي في كل الأجهزة اللي بالي بالك! 

وبعدين هانعمل إيه في بقية الشعب اللي لسه ما اتوظفش، والكام مليون اللي ماعندهمش وظايف، والخمستاشر  عشرين مليون اللي عايشين تحت الكباري وفي المدافن!! والقانون هاينطبق على سكان المستعمرات والمستوطنات، ولا دول مش موظفين؟!