(الله يرحمك يا أمي، ويرحم كل الأمهات، الأحياء منهم والأموات)

يا خالق الحياه

من طينة العدم

وخالق الحنان

أقوى من الألم

إخفض جناحي رحمه

يا ألف رحمه يا امّه

يا أنعم النعم

.

با مسح دمعي في كمي

مش عارف ليه يا أمي

أنا حاسس بالندم

.

يشهد عليّا ربي

ما قلتش غير نَعم

ما قلتش إلا حاضر

وفْي بُعدي كنت حاضر

أبوس على القدم

.

أطلب نظرةْ سماح

وادخل تحت الجناح

بقلبي اللي اتقسم

.

مش عارف ليه يا أمي

أنا حاسس بالندم

.

ياريتني شلت أكتر

ياريتني سمعت أكتر

ياريتني سهرت أكتر

ياريتني لم أنَمْ

.

مش عارف ليه يا أمي

أنا حاسس بالندم

.

كنتي تقولي : يارب

يكبر واشوفه أب

أضحك.. جهل وغشم

.

دلوقتي باقول : يارب

إجعل لي ألف قلب

أشيل وحدي الألم

.

وبابص كتير لبنتي

لكن باشوفِك انتي

وعينيا تتلَخَم

.

وفْي حضنها الصغير

بالاقيني بقيت صغير

وملامحي بتترَسَم.

ياخالق الحياه

من طينة العدم

وخالق الحنان

أقوى من الألم

إخفض جناحي رحمه

يا ألف رحمه يا امه

يا أنعم النعم .