تكبير الخط تصغير الخط

نزلت فى 25 يناير وقدرنا نطرد الحرامى اللى كان حاطط مطوته فى ظهرنا وسلمنا مفتاح البيت لحارس العقار "الجيش" 

بعد كام شهر لقينا حارس العقار حط بندفيته فى وشنا وبيهددنا فجرينا وشيلنا البندقية وخرجنا حارس العقار يقف على البوابة وادينا المفتاح بإدينا لأهلنا اصحاب البيت 

اهلنا ادوا المفتاح لاوسخ واحد فينا لمجرد انه مربى دقنه وعنده زبيبة صلاة وقالوا اصله شيخ وبتاع ربنا قعدنا نصوت ونشق هدومنا ونقولهم دا اصلا بلطجى ونصاب ومايعرفش ربنا .. ماصدقوناش وادوله مفتاح البيت وسجلوا ملكيته للمفتاح فى الشهر العقارى

لقينا ابو دقن راح الشهر العقارى عشان يسجل ملكية البيت كله باسمه بحكم انه معاه المفتاح الشرعى ومن حقه يبيع ويشترى فيه زى ماهو عاوز .. صحينا على صويت اهلنا فلقينا ابو دقن ماسك جنزير فى ايده ومكتف امنا وعاوز يمضيها على تنازل عن البيت .. 

جرينا ونزلنا فى 30/6 وكتفناه وخدنا منه الجنزير والمفتاح وحبسناه فى اوضة وقعد يهلل ويصرخ المفتاح متسجل باسمى المفتاح متسجل باسمى ..

ادينا المفتاح لاهلنا اصحاب البيت تانى ودخلنا اوضتنا .. خرجنا لقينا المفتاح مع حارس العقار اللى ساب مكانه على البوابة وقعد فى وسط البيت ومعاه عقد مسجل بملكية البيت كله وادى سلاح لجزء من اهل البيت يرفعوه فى وش الجزء التانى وماحدش عارف يتكلم ولايتحرك .. ووسط التكتيفة دى هو الوحيد اللى بياكل وبيشرب وواخد راحته وبيبرطع فى البيت .. وادى اوضة من البيت لجارنا هدية او قبض هو تمنها ودلوقت بقولنا الاكل طقة واحدة فى اليوم وكل اللى بيشتغل يدينى تلتين مرتبه اتاوة عشان احميكم من الحرامية اللى بره 

تفتكروا العيب فى اللى نزلوا 25 يناير ونزلوا فى محمد محمود ونزلوا فى مجلس الوزراء ونزلوا العباسية ونزلوا الاتحادية الاولى والتانية ونزلوا 30/6 وكل مرة يرجعوا مفتاح البيت ويدوه لاصحابه ؟!! ولا العيب فى اصحاب البيت اللى كل مرة ياخدوا المفتاح فى ايدهم وبايدهم يدوه لاوسخ من اللى قبله ؟!