تكبير الخط تصغير الخط

هو ايه التحقيقات اللي تاخد سنوات في تهمة  نشر اخبار كاذبة؟ طيب ماتجيبوا الاخبار الكاذبة اللي نشرها والاخبار الصادقة وتحاكموه؟ ولو كان منضم لجماعة ارهابية ما تطلعوا الادلة والشهود وتواجهه بيها؟. الموضوع مش محتاج سنوات!! وايه لازمة اصلا الحبس الاحتياطي لصاحب رأي سلمي؟  القانون كان ما بيفرضش حبس احتياطي على المعروف له  مقر اقامة ومحل عمل.. كانت النيابة تستدعيه في اي وقت وتحقق معاه ويروح لغاية ما تتوجه له تهمة ويحال للمحكمة!! لكن يعني ايه شخص معروف محل اقامته ومقر عمله، وتهمته نشر اخبار  كاذبة فيقعد في الحبس بقية عمره؟ كل ما يخلصوا سنتين يتم تدويره على قضية جديدة برقم  جديد بنفس التهمة!! ومعظم المتهمين اصلا مافيش عليهم لا ادلة ولا حتى اوراق ملفقة ولا شهود. ومنهم اللي حتى ما حصلش تفتيش لبيته ولا محل عمله عشان عندهم قانون الحبس الاحتياطي اللي مش محتاج محاكمة ولا ادلة ولا وجع قلب!

النواب المحترمين لازم يطالبوا بالافراج الفوري غير المشروط عن اصحاب الراي المعارضين سلميا. واذا كانوا حيموتوا يعني ويبقى اسمهم بيسنوا تشريعات، يبقى يقدموا اقتراحات بتعديل قانون الحبس الاحتياطي -زي ما قال استاذنا الدكتور نور فرحات - عشان ما يتحولش الحبس الاحتياطي لعقوبة تضمن سجن مواطن بقية عمره بلا محاكمة!!

#بعتوازيادبكام؟