الفقر الدكر التعريض .مديح الحكام !!

مطلع سبعينات القرن الماضي .. طلابا يتامى.. جامعة اسيوط..

بقايا العصر الناصري السعيد..

ابوك ساب لك حته ارض زراعية..انت وميراثك ملك يمين من يزرعها..

تقطع نعلين جزم عشان تاخذ جنية ولا ربع جنية حسنة قليلة من ايجار ارضك ..لو عليت صوتك عند الباشا.. ممكن سعادة الباشا الفلاح المزارع يلعن سنسفيل ابوك واللي خلفوك ..يقولك : مفيش الارض راكبها بالقانون ..روح اشتكيني.. تشتكي خمس سنين ف المحكمة تموت فيهم من الجوع وف الآخر يرمي لك فلوسك ف خزينة المحكمة .تسكت غصب عنك.. تحط مركوبين في بقك!!

لو حبيت تبيع فدان من ملكك. .محدش يرضي يشتري ارض مؤجرة للغير ..المزارع يرفض الشرا لأنه كده كده راكبها بالقانون.. ايجار ملاليم بالتقسيط الغير مريح للمالك الضعيف.. المسكين ابن السبيل !!

المهم في تلك الايام العجاف طلاب الكلية _الا فئات تعد علي أصابع اليد الواحدة_ يسكنون البدرومات او أسطح العمارات لمن لم يوفق في دخول المدينة الجامعية..

لبس الصيف يصلح للشتاء بعد اضافة بلوفر يسمي شيرز ازرق ..تشتريه عند دخول الكلية تتخرج بنفس الشرز بعد اربع سنوات بعد ان تظهر شبابيك تهوية للشرز عند الكيان. فتحات ارابيسك جميلة في ضهر الشيرز المحروس نتيجة طول الاستعمال.. ربنا يخليه ويحميه من عين العدو وكل من شافه ولم يصلي ع النبي !!

يزاملني بالكلية.. يتيم آخر من دولة ابنود الشقيقة ..التابعة لجمهورية قنا الشعبية القرية .ابنود المجاورة لقريتنا اسمه محمد مازن ..اسم الصديق وليس اسم شرز لامؤاخذه!!..حبينا نشبرق علي نفسنا ..رحنا مطعم بغرب أسيوط.. منطقة المجاهدين.. اسمه مطعم كمال محروس..

طلبنا كل واحد ..نص حمامة مشوية معاها واحد ملوخية يللا ان شا الله ماحد حوش..

احنا قاعدين ناكل ونمزمز بامان الله دخل زبون وزنه 2 طن قصير ..بدين ..في الاربعين من عمره ..يلبس جلابية افرنجي بنص لياقة صدرها مفتوح يظهر بطنه وثدياه المترهلين وبقايا شعر صدر.. هيئته تؤكد انه معلم جزار قعد ع الكرسي خشبة قعدة كرسي العفي التحتية بمقاس فتحة تهوية غريمنا السفلية فقط لاغير .. افخاذه السمينة تتدلي معانقة ارضية المطعم.. كامل الدسم بالصلاة علي حضرة النبي!!

طلب: ٥ اجواز حمام مشوي كيلو كباب ريش السلطات خاطب الجرسون بقرف: شيل العيش من قدامي مفيش داعي !!

احنا قاعدين نناور بالعيش نلف ..ندور حوالين نص الحمامة اليتيم زينا نشم فيه.. نحترمه نبوسه ..نغمز ربع الرغيف ف ذرات ملوخية ..نلحس. نحسس. نبوس !!

صاحبنا نازل هجوم كاسح علي عشة الحمام اللي قدامه يلف ريشة الضاني بصدر حمامة يرمي ف مواسير المجاري المفتوحة عميت عينيه.. ماشيفش لاتنين اليتامي اللي مزروعين قدامه عينيهم تطلع نار وشرار ..نبتهل للمولي عز وجل : حار ونار في جتتك يابعيد ..يارب تموت ياشيخ..الهي وانت جاهي عيالك مايفرحوش لك بدخلة!! الهي قنابل هيروشيما ونجازاكي ينزلوا علي فخادك الاتنين يفرتكوهم فرتكه يابعيد !!

المهم غمزنا لبعض : خلص..قوم..لو قعدنا اكتر من كده ممكن نموت من الحسرة !!

قمنا لنذهب لمقهى قريب نلتقي بواحد صاحبنا غاوي صحافة ليحدثنا عن امير خليجي جديد.. يزور مصر اسمه زايد بن سلطان ال نهيان..يدفع للصحفي اللي يكتب مقال عنه الف جنيه ايامها كان راتب استاذ الجامعة ..وهو اعلي من رواتب القضاء والضباط في حدود الخمسين جنيها..الف جنيه !!..ياسلام!!

لديه شاعر فلسطيني يمدحه.. يرمي الشيخ عليه فلوس..رزم..رزم.. الوفات بدون عدد..

ارانا صديقنا قصيدة لشاعر الامير. .قريتها قلت: ضعيفة ..تعبانة. كنت ايامها عبقري إنجليزي ولغة عربية. مش زي دلوقتي اعمي ..كحيتي.. معرفش الالف من كوز الدرة صاح صاحبي: طيب اكتب وورينا..

الجوع والفقر ابن ستين كلب يخليك تمدح ام سحلول جارتنا تطلعها فاتنة المعادي ..تطلع فيفي عبده ام مثالية يخلي احمد موسي يمدح مرتضي وبعد اسبوع يشخر له ويشتمه !!

لاتسالوا الناس بل اسالوا الظروف علي راي المرحوم إحسان عبدالقدوس ..تحدي بقى .طلع ورقة وقلم واكتب ياحاج مازن محمد مازن خطاط ورسام. اكتب من اول السطر قصية عصماء :

قسما بنهيان وتالد مجده وباسد ظبي ابيه .. ثم بجده

لهو العزيز المرتجي وهو الذي ما عهد كسري والرشيد كعهده

تسعي الوفود لقصره ولسانها وقلوبها تبدي الثناء بحمده

يلقاهمو بالبشر بدر سماءه كالبدر إشراقا وليس ببعده

والدهر كم قهر الملوك وكم عدا لكنه لاميرنا من جنده

كم محنة قد ردها كم منحة نلنا فاكرم بالنوال ورده

المهم: القصيدة عصماء ..طويلة حوالي عشرين بيت..بيت ينطح بيت!! هذا بعض مااتذكره منها استلفنا فرخين ورق من طالب ف كلية هندسة..اكتب يامازن..خطك جميل..ياريت كمان ترسم سمو الامير الجميل ده صوره رسم صورة طبق الاصل. . المشكلة: شبه الجدي اليتيم!!

عيب ياراجل..الامير لو شاف شكله يزعل يمكن المدام تطلقه حسنه شويه..رسمه طلع شبه الموناليزا او ليلي علوي في شبابها..برضو. .ميصحش. .كفاية..نبعت له القصيدة..واجهتنا مشكلة ..تدبير تمن طابع بوستة بريد خارجي..مبلغ باهظ ..قرشين صاغ كاملين..

بعد مداولات ومزايدات ومناقصات ومفاوضات شاقة..استقر العطا علي ان يدفع مازن قرش نظير حصوله علي نصف المكافأة المتوقعة ..الفاتحة على ابن الحرام ..اللي يخون صاحبه..الفاتحة.....امين..

أسبوع..أسبوعين..شهر..عشان مولانا يرد..مولانا مص ع القصيدة لمونه ..كل يوم نقف نقرأ كشوف الطلبة اللي جياها جوابات ع الجامعة مفيش ..

صاحبي مازن بذكائه الغير معهود..توقع ان شاعر الامير سرقها م البوستة.. يللا..مابدهاش..نلم قرشين كمان ..نبعت ونستني..علي رأي خالتك نجاة الصغيرة..محدش يرد..توقعات: اكيد الرقابة علي البريد قروا الجواب وقطعوه .. ولاد كلب يعملوها..نبعت مسجل بعلم الوصول..المشكلة تمن الجواب تسع قروش ونص ( تعريفة)..اهو النص ده..خلانا خاصمنا بعض سنة..صاحبي إستنطع ..مش عاوز يدفع النص تعريفه بتاعته ( اتنين مليم ونص بحالها..بعيد عنكم)!!

احكي لكم الحكاية الطويلة العريضة دي ليه ؟؟!!

علشان مانلمش علي اللي باع صوته بكيلو سكر وتلقيمة شاي او ربع فرخة ولاخمسين جنيه!!

احنا مش ملايكه. .الفقر والجوع..يخلي البني آدم مننا ..اوطي من موس الناست ع الاسفلت. .اسالوني انا..خبرة سابقة !!