جمال عبدالناصر وانا !!

وقفنا عند القبض علي خالنا احمد
اعتقاله بتهمة انه اخوان مسلمين..الحكايه ببساطه..الراجل ساكن في منطقة الشنهوريه..

بيشتغل مدرس تربيه رياضيه.. مقر الاخوان في منطقة الشنهوريه..جنب رباط ابوالحسن حاليا..الاخوان مرضي عليهم من الحركه المباركه وع الحجر..
في ترابيزة بنج في مقر الاخوان..بعد المغرب كل يوم يروح يلعب بنج مع اصحابه..

الراجل ريفي ساذج فرحان بالترابيزه والمضربين الخضر..مسجل نفسه في كشوف الاخوان عشان ميدفعش حساب ترابيزه ..

 لانه حتي تاريخه كما عرفت.. علاقة بسلامته بالسياسه زي علاقة حضرتك بالنظريه النسبيه لاينشتين. .
محدش يعرف ف الصعيد عندنا ايه اللي شقلب العلاقه بين المباركه والاخوان...بعد القبض ع الخال ..بيت الشنهوريه.

.اللي ساكن هو في دور ..احنا واخواتي ف دور تاني ..البيت بقي قبر ..هو كان طالع نازل يضحك ويزعق..مراته وعياله ..

اظن راحوا بيت ابوها اوفين معرفش..احنا عزلنا لمنطقة الحميدات..شارع المنطقه التعليميه ..خلف مبني امن الدوله..

 اسمها ايامها المباحث العامه..قدام بابها..عساكر وفوق مبناها عساكر..وخلف المبني..ارض حولي فدانين..

اسمها الخرابه.. يرموا فيها الزباله والقزاز المكسور ..جنبها علي مسافه امتار قليله مبني لايكتمل ابدا..كل اللي يشتريه ويحاول يبنيه يموت..

اسمه بيت واكل صحابه..بيت الحميدات سكانه ..كلهم حلوين جدا..منهم واحد مدرس موسيقي في مدرسة المعلمين الموسيقيه من المنصوره..بناته
عيونهم خضر وامهم
..دول قصة تانيه طويله..ديوان شعر لامل اخويا ..قلبي والعيون الخضر..لكن حكايتنا النهارده..

ليها علاقه باسرة من اطيب خلق الله مسيحيه ..ام نصر الجميله الخدومه اللي تعاملنا زي ولادها بالضبط..

ابنها التاني ..صمويل من سنين ..بنروح حضانة سفينه دوس مع بعض..اشطر واحد ف الحساب واعز اصحابي ..

بحبه وبعتبره اخويا..معانا ولد من اغبي خلق الله..ربنا يذكره بالخير اوبالشر يكون احسن..باعتبره المؤسس الاول والحقيقي للفكر الداعشي..

قال لي ايه الواد ..ده اللي انت مصاحبه..وبتقول لك خال ..محبوس..ابو الواد ..

هو مصاحب الناس ..ويقول للحكومه تحبسهم..ايوه يابن عمي ..انت طيب ومش واخد بالك..ابن الكل.....
مكدبتش خبر..بيلعب صمويل ..كوره شراب قدام البيت ..امه بتبص عليه تراعيه..جبت نص قالب طوب..حدفته بغيظ علي عصبة رجله..

الصفرا الممصوصه ..مانساش ..نظره عين امه ليا..فيها فزع وبتقول ليا: انت اللي فاكراك طيب تضرب اخوك كده..

المهم صمويل بعد كده ..بعد عني بقي يمشي بعيد بعيد.. حسيت بالذنب..بس الغبي التاني ملي مخي ابوهم مخبر..

يقول لي: بيقولوا واخدين قريبك اخوان مسلمين..محدش يعملها غير ابوه..
بعد كده عرفنا ان ام صمويل الجميله الطيبه جالها سل وبتنزف..ايامها كان السل مالوش علاج ويموت..الغبي رجع يقولي..

انت طيب وربنا انتقم ياواد عمي..طولت شويه عليكم..المهم عزلت الاسره دي..
كبرت وعرفت ان اخواتنا دول ملهمش دعوه خالص....من ستين سنه..نفسي اشوف صمويل ..اعتذر له ..ابوس راسه..

انا غلطان ياصاحبي..بس مش لاقيه..الله يخرب بيت الاغبيا في بلادنا كلهم...