و انت مطبلاتى وشايف ان الاقتصاد فل الفل ... وسياستنا الخارجية فل وعشرة .. ومصر فيها انجازات لم تحدث منذ الفراعنة لا تكمل قراءة هذا البوست من فضلك.

 ولو انت اخوان برضة وشايف ان مصر ضاعت وان السيسي عميل صهيونى لتدمير مصر .. والجيش اصبح بيحمى النظام فقط وليس الدولة  فبلاش تكمل قراءة البوست برضة من فضلك .

بما انك وصلت للسطر ده فانا بفترض انك زي حالاتى شايف حاجات حلوة حصلت فى البلد وشايف برضة حاجات وحشة حصلت فى البلد .. 

 خلينا نحدد كلامنا .. اه فى انجازات حدثت فى مجالات عودة الامن للشارع وحل ازمات الخبز والبنزين وفيروس سي والكهرباء وتطوير شبكة الطرق وتسليح الجيش بلا شك .. 

 وفى برضة سلبيات من تضاعف الديون الخارجية والداخلية والبطالة والضرائب والرسوم والكارتات والاكتفاء بسياسة الصوت الواحد وتفصيل البرلمان وتراجع دور مصر الخارجي امام الخلايجة وتضاعف معاناة الناس المعيشية وحالة انقسام مجتمعى حاد.

 انا شايف ان اكبر مشكلة تواجه مصر حاليا مش سد النهضة بل غياب الرؤية والتخطيط المستقبلي ... !!! معقول دى اخطر من سد النهضة ؟ ايوه لانها هى سبب كل المشاكل بما فيها سد النهضة والازمات المختلفة ...  وانت بقى يا عم خالد الخبير اللى حيقدم الحل اللى عجز عن تقديمه رجال الدولة اللى عندهم كل المعلومات ؟؟؟ ... طب اصبر عليا بس .. 

 الحل هو عقد اجتماعي جديد .. عقد اجتماعي بين النظام الحاكم الحالى والمواطن ... عقد يلتزم به النظام الحاكم بتحقيق رغبات الشعب فى مقابل التزام المواطن باستمرار الحاكم فى الحكم .. طب نحقق الكلام الفخيم ده ازاى ؟ 

نعمل اجتماع اسمه مصر 2050 .. انت بتقول اجتماع تاني !! مش كفاية اجتماعات بقى !! لا ده اجتماع بجد ... اجتماع لا يحضره الرئيس ولا الوزراء ولا تنقل جلساته الفضائيات بل جلسات مغلقة فقط للخبراء  ... اجتماع خبراء بجد وليس زفة تطبيل ولا مكلمة .. اكرر اجتماع لا يحضره سوى الخبراء الحقيقيين فى اربعة مجالات هى الاقتصاد والسياسة والاجتماع والاعلام .. الخبراء الحقيقيين من مصر وخارجها بصرف النظر عن موقفهم من النظام الحاكم الحالى (مؤيدين ومعارضين معا) .. وعندنا عشرات الخبراء العباقرة بجد فى تخصاصتهم.

 ينعقد الاجتماع على مدى شهر كامل فى قاعات مغلقة عليهم .. ليخرج في نهايته الخبراء بروشته عاجلة للانقاذ فى الاربع مجالات (اقتصادية - سياسية - اجتماعية - اعلامية) ..  وروشتة اخرى طويلة الاجل حتى 2050 تكون ملزمة للنظام الحاكم حتى 2050 مهما اتغير الرئيس (يتحدد فى الروشتة العاجلة مثلا الاولويات الحالية هل نستمر فى صرف فلوس الديون على العاصمة الادارية والكباري ولا نعمل مصانع ومزارع .. الخبراء هما اللى يحددوا .. هل نعمل قطار مصايف ب 300 مليار جنية ؟!!!) ... بينما فى الروشتة المستقبلية يحددوا الارقام المستهدفة للبطالة وكيفية سداد الديون ورفع مستوى المواطنين بالارقام والخطط المحددة مش بالوعود والسهوكة ...  روشتة حقيقية مش مكلمة يعنى خطوات تنفيذية محددة الأهداف والمدى الزمنى وبالارقام.

 الاجتماع ده مش اختراع من عندي  ... ده اللى بتعمله الدول عند مواجهة المشاكل .. تلجأ للخبراء وليس فقط لرؤية فرد ... امريكا نفسها عملت كده فى وقت ريجان ١٩٨٣ وعملوا تقرير "امة فى خطر " Nation at risk ... والتزمت به كل الانظمة الحاكمة حتى الان وغيروا كل نظم التعليم والإعلام  

نفس ما فعلته اليونان بعد انهيارها اقتصاديا ونجحت بخطة انقاذ من ثلاث مراحل فى التعافي وبدات الازدهار الان ... وما تفعله اسرائيل فى مؤتمرات هرتسليا الدورية لصياغة الاستراتيجيات كل عشر سنوات لمتابعة ما تم والالتزام بالباقى ... وما فعلته شيلي وكوريا الجنوبية وجنوب افريقيا وعملته زمان اليابان بعد ما اتدمرت فى الحرب العالمية التانية باجتماع مجلس الحكماء ... وغيرها من الدول.

ده مجرد اقتراح للخروج من الوضع الحالى المتأزم ... خروج بدون عنف او تدمير للبلد اللى بيزداد فيها الاحتقان يوميا ... وتبقى التفاصيل مهمة جدا زى مين اللى حيحضر؟ وكيف نضمن التزام النظام الحاكم بالموافقة ثم بالتنفيذ مقابل استمراره فى الحكم  ... كلها تفاصيل مهمة ولكن يمكن تنفيذها لو صفت النية وعقدنا العزم على انقاذ البلد ... متقولش انت بتحلم .. او حتى قول انى بحلم ... ما كل حاجة عظيمة بدأت بحلم.

 دي رؤيتى الشخصية ... من حقك طبعا تختلف معاها .. من حقك ترفضها بس ناقشنى او قدم انت حل تانى للانقاذ ونتناقش  ... حل يجنبنا الخراب .. حل يمكن تنفيذه فى ظروف مصر الحالية .. اتمنى كل واحد يقدم حل .. نناقشه .. ننقحه .. او حتى نرفضه ... المهم نعمل حاجة ... لانها بلدنا .. والله الموفق والمستعان.