في قيلولة الظهيرة ...و تحت المكيف ممدد انا كعصفور وليد لا أبالي بما مضي وبما هو أت ليرن موبايلي ...

ترررررن ... تررررن ... صوت نسائي حنون دافئ

_ الاستاذ سيد صابر مساء الخير يا فندم

_ يا مساء التفاح ... مساء الفل ... طب ما تيجي انبوكس يا باشا...

ضحكة رقيعة وبعدها همسة ... 

استاذ سيد انا بكلمك من رئاسة الوزراا ... ورفعت صوتها قليلا ... استاذ سيد قرر السيد رئيس الوزراا المكلف ترشيحك وزير في الوزارة الجديدة ...

_ وزير ... وزير ... وزير ايه ان شاء الله ... بلاش تهريج ومعاكسة 

_ يا فندم انا بكلمك بشكل رسمي السيد رئيس الوزراء قرر تعينك وزير السعادة في الوزارة الجديدة ويدعوك لحلف اليمين أمام القيادة السياسية غدا في العاشرة صباحا ...

_ وزير السعادة زي الدولة الاسكندنافية والإمارات وكده وانزل اوزع دراهم وريالات وورد وابتسامات علي الناس في الشارع ... يا حلاوة ياولاد ... بقولك ايه يا بنتي لو بتشوفي رئيس الوزراا المكلف قول له سيد صابر موافق بس عنده شوية شروط صغنتتة عشان يوافق عالوزارة ...

_ شروط ايه يا فندم ... ده حتي حضرتك هتاخد وزارة جديدة وكلها آلش وفرفشة وسعادة ... شروط ايه سعاتك ممكن تقولها لي عشان اوصلها للسيد رئيس الوزراا ...

_ بصي ياسنيوريتا بلغيه ان سيد صابر موافق عالوزارة بشرط تحقيق كل طلباته وهي تقريبا الطلبات التي ستحقق السعادة للشعب المصري وهذا صميم عملي كوزير للسعادة ... لازم في الاول يتم الموافقة علي خطتي بأسعاد الشعب المصري والتي تشمل منع النت عن كل جروبات الميميز في الوتس لان الجروبات ديه كفيلة بأشعال الحرب العالمية الثالثة ... قرار من وزير السعادة بأنهاء عقد مني وسهير  من برنامج الستات مايعرفوش يكدبوا وتظل مفيدة بمفردها في تقديم البرنامج ... هي مني وسهير بيعملوا ايه يعني ... مفيدة بتحلق زي شوبير علي سهير ومني وبتمنعهم يكملوا جملة مفيدة ولو في ضيوف مفيدة هي اللي بتسئل وكمان هي اللي بتجاوب وهي اللي بتخرج وهي اللي بتعد وهي اللي بتطلع ميتين أهل المشاهدين وعليه تفضل مفيدة لوحدها وكده المشاهدين يزهقوا ويطفوا التليفزيون ويوفروا فواتير الكهرباء وفيزيتة أطباء الأعصاب... اه والنعمة ... قرار  وزير السعادة بأعدام الزميل وزير التربية والتعليم علي خازوق مطعم بقطع من التابلت في قلب ميدان التحرير وهذا القرار كفيل بأسعاد المدرسين والطلبة وأولياء الأمور والفلاحين في مزارعهم والعمال في مصانعهم و الميميز المتدفئين حول مواقدهم في جبال الألب والجلالة والمقطم .. قرار وزير السعادة ولاسعاد بعض الناصريين وكل السيساوية بأعتقال كل الإخوان ولأسعاد الإخوان نصدر قرار بأعتقال كل مصر ولأسعاد الثوار قرار بحبس كل الفلول ولارضاء الفلول واسعادهم قرار بأعتقال وشحططت وبهدلة كل الثوار  والقرار الأهم هو قرار بأقالة كتبة خطابات الريس ... ليه تكتبوا لسيادة الريس ... ارتجال الريس من أهم اسباب سعادة المصريين ...

وجاء صوت مبعوثة معالي رئيس الوزراء مرتعشا" ... يالهوووووووي انت عاوزني انقل الكلام ده لرئيس الوزراء يا فندم ...

_ روحي يا بنتي قولي له ... سيد صابر كبيره يسعد قرائه بمقال زي ده ... وغير كده بلح