مسحراتى

بصرخ ليلاتى

على طبلة صوتها

آنين ناياتى

أصحوا و فوقوا

لكل آتى

أوجاعنا جارحة

و دموعنا سارحة

أوضاعنا شارحة

من غير ما هاتى

*

يا خطوة خطى

يا ندهه ردى

يا شط عدى

و اكتب بخطى

مليون علامة

على فجر طالع

عارف مطالع

قادر يطالع

شايف طريقنا

يبل ريقنا

بسكة سلامة

حاسس وجعنا

و اللى وجعنا

مليانة روحنا

امل فى بكره

عزة و كرامة

سنين تعدى

و سنين تمر

و طعم يومنا

علقم و مر

حكم الديابة

عاوزينها غابة

مانشوفش فيها

حاجة تسر

عاوزينا نيأس

و نقول خلاص

معتش فايدة

و لا خلاص

نرضى بمهانة

و استكانه

و عيشة ذل

منقولش لأ

و لا نطالب

بأى حق

ملعون أبو

العيشة الجبانة

ملعونة لقمة

ذل و مهانة

اصحى يا خال

و يا عم فوق

مسحراتى الغضب

و الاحتجاج

و الشوق

الجدر مادد لفوق

بحلم بفك الطوق

و الصوت يشق الحلوق

و الروح بتنسج

من الجروح موال

الليل طويل

لكن النهار جوال

عايشين يا مصر

فى موالك و ما نسينا

يا ألف آه و آهين يا نيلنا

يا ألف آه وآهين يا سينا

لا حدودنا من كل الجهات آمنه

و لايوم من الأيام رسينا

و نغنى تانى

شوقنا لصبحك

من بعد قمحك

يا مصر و انتى

تاهت ملامحك

و ضيعتنى

لكنى عارف

و يغنى عودى

ان مسيرك

فى يوم تعودى

و تشدى عودى

حكمة جدودى

من يوم وجودى

انك تجودى

من بعد شدة

انك تعودى

من بعد ردة

و انك مرابطة

ليوم المعاد

مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق