يا ست ياللي مواضع النجمات

على شعرك ورجلك نور

وفوق صدرك وبطنك حس

مش حاقدر امشي

تحت قبتك السماوية الليلة دي

ولا حاقدر أمشي

برجل حافية تجس

على رملة مبلولة وشاربة الملح

ولا ع النجيلة

ولا التراب

ولا أدخن

ولا أشرب القهوة

ولا اضايف الأغراب

ولا أقول السيرة لأي حد

كما عشتها وعشناها

في عمرنا الممتد

يا ست ياللي ابتسامتك نادرة

بس بجد

انا غريب الليلة دي في وسط هذا المد

ولا أي حد

في هذه الدنيا

دخل في نفسه الليلة ما استغربش

الموت ما بيبطلش ما يقربش

واحنا ما بنبطلش

أنا في الليلة دي والليلة اللي جاية اتنين

وعندي عشرات الألوف

من الأيام

من الناس اللي ساكنة في جسد واحد

بننام ونتعارك

ونصحى نعزي ونبارك

الدنيا أصعب من أخدها ببساطة

الدنيا أطيب من وهم هذا الشعر

يا ست ياللي لامسة الأرض بطراطيف الصوابع

اعتبري هذا الكلام .. كلام من ابنك الضايع

الولد اللي مش عارف يحقق حاجة

وبيهرب

من قضاء ربنا

إلى قضاء ربنا

وبينهزم

بسذاجة.