تمثل المقابلات الشخصية عبئا على الممتَحَن سواء أكان طالب علم أو طالب وظيفة وكانت الإمتحانات الشفوية فى الكليات العملية أيامنا تلك من أهم الإمتحانات وكانت درجاتها فى كليتى كلية الصيدلة تمثل ربع الدرجة الإجمالية المخصصة للمادة...يعنى درجات إمتحان الشفوى الذى يعقد آخر العام يمكن أن ترفع الطالب لفوق فى السما أو تخسف به الأرض...

وتتكون لجنة الإمتحان من إثنين من الدكاترة أحدهم من كليتنا من أساتذة المادة  والآخر ممتحن خارجى من جامعة أخرى...وفى الغالب الممتحن الخارجى هو الذى كان يدير الإمتحان أو يكون البادئ بتوجيه الأسئلة بوصفه ضيفا...وغالبا يكون الهدف من الإمتحان مش تقييم علمى فقط بقدر ماهو تقييم شخصى وعلمى معا والحكم على الشخصية ودوما وبذكاء  الممتحن وخبرته لايترك لك فرصة للإسترسال  عندما يحس إنك فاهم السؤال وينقلك لسؤال آخر وهكذا يتنقل بين أبواب المنهج لغاية مايزنقك...ماهو العلم موجود فى الكتب !

وفى يوم الإمتحان تتكون عدة لجان منها السهل والدكاترة طيبين وحنينين...ومنها الصعب والدكاترة من تلك النوعية الجادة جدا ومفيش فى قلبه رحمة لأبنائه اللى مش مذاكرين حلو   وأنت وحظك...وتجد الطالب منا خارج اللجنة فى إنتظار دوره كمن ينتظر مولودا واخد الطرقة  رايح جاى واللى ماسك مذكرة واللى ماسك ملخص وكله وشه أصفر ويادوب أى حد من الزملا يطلع من أى لجنة الطلبة نتتلم عليه ...إيه الأخبار؟ إتسألت فى إيه ؟وجاوبت إزاى...وهكذا...

وتجد غالبا فى أسئلة بعض الدكاترة للطلبة ما يصدمهم والدكاترة بخبرة السنين يكون طرحهم المبدئى مدخل لأسئلة فى صلب الموضوع ...

تجد الفراش واقف زنهار ينادى الإسم اللى عليه الدور وبرضو بيسترزق من الطلبة...أذكر على سبيل المثال أنه فى السنة الأولى فى الكلية وقبل الجتة ماتنحس وناخد على الإمتحانات وكانت هذه تجربتى الأولى مع الإمتحانات الشفوى وفى مادة النباتات الطبية(العقاقير) نادى عم عبده...

محروس عمر ...

دخل محروس وأغلق باب اللجنة خلفه...

-من فين يامحروس ؟

-من الأقصر يادكتور ...

-مذاكر إيه يامحروس ؟

-مذاكر كله يادكتور ...

-طيب أنت بتزور المعابد ؟

-أيوه يادكتور دى بلدى وبأشتغل فى شركة سياحة فى الصيف...

-طيب يامحروس...إيه المعبد اللى فى الدير البحرى ؟

-معبد حتشبسوت يادكتور

-طيب يامحروس...حتشبسوت راحت بلاد بنت وجابت إيه من هناك ؟

-جابت شوية نباتات وعطور وكحل ...

-ولو أنت فى مدخل المعبد على شمالك هتلاقى كام شجرة مزروعين جابتهم الملكة حتشبسوت معاها تعرف إيه نوع الشجر ده يامحروس ؟!

محروس...بَلّمْ...وريقه نشف...

-بصراحة أنا كل يوم عند المعبد ماشفتش شجر لايمين ولا شمال...

-ياراجل أنت متأكد...دى شجرة مشهورة...

-لا والله ماشفتها...

-دى شجرة الحنة...عارف شجرة الحنة فايدتها إيه ؟

-أيوه يادكتور بيتحنوا بيها الستات والرجالة...

-طيب عارف فايدة الحنة إيه للجلد ؟

-..........

-طيب تعرف تقوللى إسم المادة الفعالة اللى فى الحنة ؟

-ماأخدنهاش...

-طيب من مواصفات ورق الحنة تقدر تعرف بتنتمى لإي عائلة من عائلات المملكة النباتية ؟!

-........

الدكتور يقلب فى كراسة إجابة محروس الخاصة بالإمتحان النظرى...

-طيب يامحروس إتفضل ...

-والله أنا مذاكر يادكتور ...

-إتفضل يامحروس...

يخرج محروس يجرجر أذيال الحسرة...

وأنا التالى له يطلب منى محروس أن أحاول أن ألمح درجته التى أعطاها له الدكتور فى الكشف الذى أمامه...

اللى بعده محمد كامل ...

دخلت وركبى بتخبط فى بعض وبصوت مختنق 

-سلام عليكم ...

-وعليكم السلام ...

-أنت مربى دقنك ليه يامحمد أنت تبع الجماعات...

-لا يادكتور هى قلة فضا بسبب المذاكرة ..لكن أنا راجل بأنتمى لمصر...

-طيب يامحمد ياكامل...عبد الناصر كان صديق لعبد الحكيم عامر ورغم كدة إنتهت صداقتهم نهاية مأساوية تفتكر عبد الحكيم إنتحر ولا تم تسميمه...

-الله أعلم...

-طيب عارف الطماطم والفلفل والبطاطس ...

أيوه يادكتور عارفهم ..

دول من عائلة معروفة فى المملكة النباتية وهناك نبات سام فى نفس العيلة تعرف إيه هو ؟!

-المملكة النباتية واسعة وفيها النافع وفيها الضار...

-لو قلت لك إن الطماطم والفلفل والبطاطس من العائلة الباذنجانية

(Soalanace)

تقدر تقوللى نبات سام من نفس العيلة ...

-أيوه يادكتور هو نبات خانق الذئب أيوه درسناه...

-طيب تعرف تقوللى المادة الفعالة فيه...

-أيوه أكونيتين...

-تفتكر المشير إنتحر والا إتسمم وليه بيشكوا إنه إستعمل الأكونتين ...

-..........

-إتسمم بالأكونتين لإن الإكونتين يختفى أثره بسرعة ولايظهر فى التحاليل...طيب إتفضل ...

-بس أنا ...

-إتفضل...

وخرجت ...ووجدت محروس فى إنتظارى...

-شفت درجتى ؟!

-أنا ماكنتش شايف حاجة خالص ...

اللى بعده مصطفى جلال...

-إيه الأخبار يامصطفى...

-الحمد لله...

-زمان ماكانش فيه مكيفات إزاى أهل الصعيد بنوا بيوتهم علشان تبقى طراوة...

-......

سمعت عن المهندس حسن فتحى وإستخدامه لعناصر البيئة...  

-........

-طيب سمعت عن الأقبية... 

-.......

-طيب ليه عملوا الأقبية دى معمولة فى المناطق الحارة فى البيوت والمساجد...

-.......

-العائلة النخيلية تعرفها(Palmaceae) ...

-أعرفها...

-أذكر لنا مثال...

-النخل بتاعنا اللى بيطرح بلح...

-طيب ليه بنفطر على بلح بعد الصيام  والست بعد الولادة بتاخد مشروب حلبة بالبلح ؟!

-علشان البلح فيه سكر الفركتوز الأحادي سهل الهضم سريع التأثير...

-كام ذرة كربون فى الفركتوز ؟!

-خمسة...

-تقدر تعمل إختبار للكشف عن الفركتوز ...

-أيوه بس ده فى الكيمياء وأنا لسة ماذاكرتش كيميا...

-طيب إتفضل يامصطفى  ...

-بس أنا والله مذاكر إسأل تانى يادكتور...

-إتفضل يامصطفى