حمد الله ع السلامة 

رغم الأسي والندامه

رغم زنازين الرفاقه 

رغم الأرق والخوف علي بكره

تفضل الفكره .. فكره 

مش مهزومين يا بشر علي فكره !

إحنا بنريح شويه وبالمره بنقرا وشوش 

وبنعرف مين معانا ومين مغشوش 

ولما ينادي الوطن ..وها ينادي 

يطلع يناير جديد في سما بلادي 

بلادي .. بلادي .. بلادي .

باكتب لك .. رغم إني نسيت الشعر 

ورغم اللي قاله عمنا بريخت : 

" الكلام ع الشجر حرام 

لما يكون السكوت علي غيره جريمه " 

با كتب عشان الدم اللي روا  سينا 

والدموع اللي دارت بيها سواقينا 

عشان بكره اللي شايفه جاي 

شايل معاه أحلام رضوان وعبد الحي 

أحلام ليالي الجبهة اللي نطرناها علي جسور العبور 

وحياتك يا كل شهيد أكلت معاه عيش وملح 

ليفضل حلمنا عايش لحد ما تهل لحظة الفتح

شيئ أغرب من التخيل 

إن بعد ما العمر جفت منه القوافي 

بعد مراسم دفن الفروسية والفرسان

يدق الشعر باب قلبي  وكراسي 

ويشيل بطاطين الهموم من علي راسي 

يرجع قلمي يخزق عيون البصاصين 

ويكتب في صباح خمسة وعشرين 

هما كمان راجعين 

زهور البساتين !!