الملامح العبثية للدراما الرمضانية :

كتابة ضعيفة وغير مترابطة وتفتقر لقواعد الدراما والمنطق والإبداع !

موجة من العنف والقتل والحرق والإغتصاب والبلطجة والصراخ مع قصور وفيلات تتفوق على إعلانات زد  عن الفيلات!!

مغامرات خيالية للشاطر البلطجى سيف الخديوى مع ست الحسن تفوقت على الدراما الهندية فى تلميع صورة البلطجى الجميل أمام قبح رجل الأعمال اللص ! بلا منطق!

ما ينفعش مسلسل كامل يبقى شبه  مونودراما لممثل واحد  حتى ولو كان النجم يحى الفخرانى..وما ينفعش طول الحلقات بيسكر و يعابث النساء فى سنه المتقدمة! وبيدور على ابنه الحقيقى، فين الدراما فين القضية أو الموضوع أو أى حاجة !

ما ينفعش مكياج جمال سليمان كل شوية مخبوط وبعدين خف ،وعلاقة سهر بسائق توك توك عبث درامى غير منطقى !

أما العسل بالأفيون ده جديد بصراحة!فى مسلسل غريب عجيب، والبطلة مش مفهوم هى عايزة اية  من حياتها !؟ 

مش مقبول الدراما الذهنية القاهرة كابول تعدى من غير مناقشة ذهنية لدستور الإخوان من كتب مثل معالم فى الطريق  والإعتماد فقط على خلق أحداث مفتعلة للشخصيات !

وما ينفعش نمنح بن لادن الجنسية المصرية !

ما ينفعش الحلفاوى طول الوقت بيدلدق حكم ومواعظ ومنها حكم فيها أخطاء تاريخية من قبيل أن مصر البلد الوحيد الذى لم يشهد مجاعة !

ما ينفعش نجم  يسيب جسمه يترهل ولسانه يتقل !والأخطر أنه مش بيجسد الشخصيات ولكنه بيقدم الصاوى فى كل الشخصيات !!

ما ينفعش كل سنة نبقى محتاجين ترجمة و(صب تيتل) عربى لكلام النجم  محمد ممدوح ...إللى مش ممكن نصدق أن الستات ها تموت نفسها عليه !و مش ممكن نصدق أنه نجم أصلا !!

وفى الإختيار 2 صوت أحمد مكى فيه مشاكل كتير !

ومش ممكن المؤلف يصدعنا بفكرة أنه خايف على حبيبته وكل حلقة يسيبها ويرجع لها فى الحلقة إللى بعدها ...ده مش موضوعنا...عندك تفاصيل كثيرة أهم ...وكمان مش فاهم لية المؤلف لم يبرز فكرة أن المقدم الشهيد محمد مبروك كان بيروح ويساعد صديقه الخاين محمد عويس فى غسيل الكلى لأمه!

وكمان فى مشهد إقتحام فيلا الإخوانى المليونير أحمد عزت لماذا لم يتم تجسيد أنه صنع من بنته درع بشرى !!

ورغم كل ذلك فى تقديرى يظل الإختيار أفضل عمل لأنه عمل مرتبط بأحداث حقيقية عايشناها وأكتوينا بنارها ولم تسقط من الذاكرة، ولأنه مبذول فيه جهد إخراج وتمثيل وإنتاج ضخم ...ولأنه فى فكر ومواجهة لفكر متطرف بيتم كشفه وفضحه مع تسجيل بطولات وتضحيات لمصريين قدموا أرواحهم دفاعا عن وطنهم .

دراما رمضان كمان بتشهد إنحسار لظاهرة رامز وظاهرة بيومى فؤاد .