رمضان كريم لماهينور

الفجر ينده أدانه

لعيون ماهيش نايمة

والعشق ربك أبانه

لقلوب كتير هايمة

والاصلا دايما يبانوا 

جوه الوجع والغم

طعم الحيطان في السجن

يشبه مرار الفم

ولقانا من غير حضن

يشبه عتاب العم

انا وانتي صرنا اخوات

بالحب مش بالدم

الاولة ماهينور

الورد قال للورد

البنت دي جنة

والتانية ماهينور

العشق حُب بجد

ما تقولشي اتمنى

والتالتة ماهينور

نايمة في عز البرد

دفيانة بكلامنا

بنوتة صوتها

يسبق سكوتها

تضحك عيونها

قبل الشفايف

كام مرة قلبي

بيقولي خايف

خايف يشوفك

يلمس كفوفك

ينسى اللياقة

ويميل عليكي

يخطف عينيكي

ويقيدها شمعة

في كل فجرا

في كل جمعة

ادعي واسبح

اجمع واطرح

سنين غيابك

مين بس يفرح

في قفل بابك

اسمع اداني

ينده وداني

الفجر حاضر

ماهينور وباقر

قصاص ودومة

أحمد وصابر

 زياد ومؤنس

جمال وشاكر

ازاي راح انسى

وقلبي فاكر

وف ضحك وشك

عمال يذاكر

زي التلامذة

يكتب حروفك

ويزيد له همزة

ويزيد له ضمة

كلمة في كلمة

اكتب قصيدة

لو فيها اسمك

تبقى جديدة

لو فيها رسمك

تبقى سعيدة

الفجر قرب

بنداه عليكي

الشمس تهرب

منه لعينيكي

يارب افتح

بابها وجيبها

علشان حبيبك

علشان حبيبها

مين قدك انت

ع الخلق أرحم

رمضان كريم

بس انت أكرم