أنف الأستاذ بهجت !

استغرق الأمر شهرا كاملا لاقناع ( بهجت ) بقبول مبدأ التعاون لمراقبة زوجته .

كان أشقاؤه الأربعة قد أبلغوه وهم في كرب شديد ,

 أن سيرة زوجته باتت حديث الشارع كله وبعض أطراف الحي , وأنها اعتاد مصاحبة الشباب واستقبالهم في بيته حال غيابه ..

ظل بهجت يقاوم الفكرة ببرود حتي اتهمه أخوه الأكبر بالدياثة وأنه يعرف كل شيء لكنه ( تيس ) لايغار ولا يشم أصلا .

وأخيرا وافق علي التعاون 

تظاهر بهجت بالذهاب الي عمله , واختفي عند نهاية الشارع , وسرعان مادخل شقته ( جمعه المحمودي ) ..

وانقض عشرة بينهم بهجت علي الزوجة وشريكها ..

أيه اللي دخلك بيتي؟

جاي أصلح حنفية المطبخ

حنفية ايه , أنت أصلا بياع أنابيب غاز  ومفيش  عدة معاك ..

أيوه أنا بياع أنابيب غاز بس بفهم في السباكة والمشكلة بسيطة بعملها بأي سكينة مطبخ ..

أوسع الغاضبون جمعه وزوجة بهجت ضربا , ثم قيداهما بحبال وجلسوا للتشاور ..

في النهاية استقروا علي عدم ابلاغ الشرطة لأن الفضيحة سوف تلوث شرفهم  وليس شرف الزوجة وحدها , 

وقال أحدهم أنهم تعجلوا واقتحموا البيت دون الانتظار لتوفير حالة تلبس كانت كافية لسجنهما.

ما أن فك وثاق الزوجة وشريكها حتي فرا هاربين كل الي طريق ..

اتفق أشقاء بهجت علي استدعاء والد الزوجة وايقاع الطلاق بهدوء 

بعد صلاة العشاء ..

في الموعد المحدد تخلف بهجت ..

واختفي نحو عشرة أيام عن البيت والحي كله ..

وبعد عودته , ذهب اليه اخوته وهم في حالة غضب شديد

رحت فين داهية تاخدك ؟

مالكم رحت ولا جيت ؟

روح ولا عيش ولا موت بس طلق مراتك

مراتي ماعملتش حاجة غلط , أنا قابلت جمعه وحلف لي مائة يمين أنه كان رايح يصلح حنفية المطبخ ..

ياعديم الشرف , حنفية ايه ؟ دي الحنفية شفناها يومها وكانت سليمة.

لأ كانت بتنقط ..

أمممممممممممممم طيب احنا ماكناش عاوزين نجرح كرامتك لكن مادمت عديم الاحساس والكرامة , اتفضل شوف ..

      قام عطية ابن عم بهجت بفتح جهاز لابتوب وبدأ في عرض ما أبطل أي دفاع محتمل لبهجت عن براءة زوجته ..

خلاص ؟

أيوه كده خلاص ..( متململا ... بس الطلاق خراب مستعجل ) ..

تتدبر , كلنا معاك في التكاليف بس نخلص من العار .

والله دي بت غلبانه بس الشيطان بيوزها يظهر 

يعني نجيب الشيطان تطلقه بدالها ولا نقتلك ونرتاح من عارك

لا أبدا .. ( هرش في رأسه وحك أنفه ) أنا بس عامل علي المصاريف في الفاضي .

فاضي ايه ؟ مرارتي اتفقعت منك . أنت بس كنت عامل راجل علينا  في أبو بلاش . ده أنت شفت أختك (عديلة) مرة بتكلم محمود البقال في الدكان وبتضحك , حشناها من ايديك وأنت بتخنقها ..

ياعم خلاص . قلنا خلاص .. بس شوفوا هتفدفعوا ايه وهدفع ايه في المصيبة دي ..

أنت عندك تاكسي ملكك وفلوس في البنك

مقاطعا ( أهلا أهلا .. أيوه كده  , يعني هشيل الشيلة لوحدي )

مافيش شيلة ولا حاجة , هي مالهاش حقوق وهتطلق من غير حقوق بس هتاخد عفشها 

ماهش ده خراب , كل واحد منكم هيروح ينام مرتاح في بيته وأنا أنام علي البلاط ..

هنفرش معاك شقتك وأنت تشيل الخمس .. ماشي كده؟ 

ماشي .أمري لله ..

تم الطلاق 

وتم وضع منقولات جديدة بناء علي اتفاق الأشقاء مع بهجت.

في الليل جلس الأشقاء للاحتفال بالانتهاء من المهمة وتنفس الصعداء معا ....

خلاص خدت الهم والغم  وراحت

هي راحت أيوه بس الهم قاعد فوق رأسي ..

هم ايه ؟

هاكل ازاي أنا دي الوقت .. هدور أشحت منكم اللقمة ولا أكل من المطاعم .. أدي احنا قاعدين بقالنا ساعة , حدش عمل لنا كوباية شاي.

 كان زمانها عملت لنا أكل وشاي , بنت الايه دي كانت عليها فنجان قهوة يطير العقل !!