دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

---------------

 روح يناير

روح جوامع

حاضنة فى قلوبها 

الكنايس و الايمان

روح جرس بيرن

مع صوت الادان

روح ضماير

شايلة نور الحق

فى قلب الميدان

روح يناير

آية فى كتاب البشر

شاهدة على العظمة

وإرادة الانسان

و الشعب لما يريد

تطلع جموعه طوفان

روح يناير

سورة فى سطور الملايكة

و رجم لفجور الشيطان

روح يناير

روح كرامة لا تهان

الا من ابالسة

فى صورة بشر

كفار بنور العدل

و بالحرية و كرامة الانسان

روح يناير

روح جوامع

حاضنة فى قلوبها

الكنايس و الايمان

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف أه يا عين

 بينى و بينك دم

و رباط ليوم الدين

بينى و بينك تاريخ

من الهكسوس إلى تشرين

بينى و بينك وثاق

معجون بنار حطين

بينى و بينك ميثاق

موصول بدنيا و دين

من هاجر أم العرب

لمارية أم البنين

و مهما يطول البعاد

لكل فجر معاد

مسحراتى بطول البلاد

أصرخ ليلاتى 

إصحوا و فوقوا

لكل آتى

رمضان كريم

شهر و عظيم

فيه العظات و المعجزات و الإنتصار

الفجر لازم يولد نهار

و الصبح مولود من نور و نار

مسحراتى و ف إنتظار 

الأمة ترفع راية إنتصار

رمضان كريم

يا نايم إصحى

وحد الرزاق