دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد 

····················

مصر مش جايلها نوم

صاحية شايلة الهم

باكية الدم

جرحها مفتوح

 من كل الجهات

مصر قلب الامهات

صدرها بينزف اهات

دمعها ع الخد طارح 

حزن ع الورد اللى مات

الف حسره و الف اه

الضمير ف بلدنا تاه

و الغباء واقف انتباه

والسياسة تايهه فى الف اتجاه

ألف حسرة و ألف اه

الوجع بيزيد أساه

و الدموع فاضت معاه

كل ارواحنا حزينة

دم أحمد ويا مينا

فى رقابنا ليوم لقاه

الف حسرة و الف اه

يا اللى نايم اصحى 

فوق

مسحراتى الغضب

و الاحتجاح

والشوق

بحلم بفك الطوق

من ليل غميق لشروق

و الصوت يشق الحلوق

و الروح بتنسج م الجروح موال

موالى مش اخضر بلون الزرع

موالى احمر بلون الدم من غير شرع

يروى الندى فى الفجر جدر و فرع

موالى ساكن اهات القلب باب الجروح

عمره ما كان جارح لكنه بات مجروح

ابكى يا عين فضفضى و البكا مسموح

يا رب يا مهون علينا بلاوى الدهر

ثبتنا طمن قلوبنا و قوى فيها الصبر 

اوجع بلاء للبشر لما يدوقو القهر 

و مهما طال البعاد

ومهما زاد العناد

مسحراتى بطول البلاد

اصرخ ليلاتى 

اصحوا و فوقوا

لكل اتى 

رمضان كريم

شهر و عظيم

فيه العظات 

و المعجرات

و الانتصار

الفجر لازم يولد نهار

والصبح مولود من نور و نار

مسحراتى و فى انتظار

الأمة ترفع راية انتصار

رمضان كريم

يا نايم اصحى

وحد الرزاق