المسحراتى :- " المجد للشهداء "

دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

---------

 كل ما يزيد الخناق و دمعاته

إفتكر دم اللى ماتوا

حافظين كتاب الثورة

و عملوا بآياتوا

خليك شديد البأس

إياك ف يوم تنكس الراية

و تبيع كتاب الأمل 

فى سوق اليأس 

الصراع دايما مرير

بين حلم عابر عتمة الليل الغبى

و بين وحوش بلا قلب و ضمير

إثبت مكانك 

 الزمن دوار

الحق طالع 

من بين مطرقة الحديد 

و سندان المرار و النار

الحق فجر بيولد النور و النهار

مهما إتحكم الاشرار

و مهما الحلم كان مخنوق 

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف أه يا عين

 الأوله حلمنا

و التانية جرحنا

و التالته نصرنا

الأوله حلمنا و الصبح روحه و ضناه

و التانية جرحنا بيزيد نقول الله

و التالتة نصرنا طالع نهار بنداه

الأوله حلمنا و الصبح روحه و ضناه و اللى انكتب مكتوب

و التانية جرحنا بيزيد نقول الله و صبرنا أيوب

و التالتة نصرنا طالع نهار بنداه يروينا روح و قلوب 

 و مهما زاد العناد

لكل فجر معاد

 مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى و ف انتظار

الأمة ترفع راية انتصار

رمضان كريم

يا نايم إصحى

وحد الرزاق

...................