كان يجلس فى غرفته فى قمة الملل بعد ان اغلق تليفونه حتى لايطلبه احد ..

كل شئ يأتى على عكس مايتمناه .. تركته خطيبته بعد ان اقاله من عمله لان الحكومة قررت ان تحول المؤسسة التى يعمل بها الى فندق .. دفع اخر مليم معه لفاتورة الكهرباء دائما تأتى الفاتورة على عكس تصريحات المسئول ..

اخرج كل مالدية من اوراق كان يكتبها ليبعها لبائع الروبابيكيا فلم تعد لديها اى قيمه فلا احد يهتم بالثقافة ..

ظل يعاتب نفسه على كل كتاباته .. الم يكن من الافضل له ترك وظيفته ككاتب ويفتح سوبر ماركت لبيع اللبان والساقع ..

أخذت الغرفة تضيق عليه كلما تذكر همومه وقد ادرك ان كل ماقرأ فى حياته عبئ ثقيل يخنقة اكثر مما كان يتصور انه ينير له الطريق ..

قام وارتدى ملابسه وقد قرر ان يخرج كى يروح عن نفسه قليل بالفسحة الوحيدة التى يهواها ..

- هروح اتمشى على كورنيش النيل زى زمان ..

لم يكن يتصور انه عندما يصل الى كوبرى قصر النيل انه سيرى الكوبرى لكن بدون نيل .. مجرد حفره واسعه .. لم يجد النيل .. والغريب فى الامر انه كان يرى جميع الناس فى منتهى الهدوء .. لم يلتفت اى احد لعدم وجود النيل مكانه ..

- لا هو انا بيتهئ لى ولا ده بجد .. انا اتجننت خلاص .. لا مش ممكن ..

ذهب لاقرب كشك ..

- ممكن قزازة ميه لو سمحت ..

- ميه ؟! .. ميه ايه ماخلاص .. فيه حاجه ساقعه ..

- وده عادى يعنى ..

كاد ان يخرج عن شعوره لكن صاحب الكشك كان اسبق فى اخذ موقف ليتحول الموقف كله الى محضر تعدى على مواطن وسيادة الامين يتهمه بالجنون ..

- وله انت هتعملى مجنون .. ضربت الرجل ليه ؟ وسمعنا كلام معقول غير اللى انت بتقوله ..

- معنديش كلام غيره ..

- يعنى انت عاوز تقنعنى ان النيل مشى .. خد بعضه ومشى مثلا ..

- يمكن ..

- يحول لمستشفى الامراض العقليه لبيان مدى قواه العقليه ..

لم يصدقه احد الا ام الامر فى مكان اخر كان مختلفا عما يحدث ..

تدارس الامر فى جهات سيادية ..

- ياحضرة الضابط اتكلم كلام معقول .. انت عاوزنى اطلع اقول للصحافة والتليفزيون ان النيل مشى بمزاجه ومش بخطة ممنهجه من بعض الدول المعاديه و اننا هندور  عليه .. يافرحة اثيوبيا فينا ..

- يافندم واحنا ندور ليه ؟ ماهو بالشكل ده السد بتاعهم اصبح مالوش اى عازة .. احنا نطلع واحد م المشاريخ يتكلم عن انتقام ربنا من الظالمين وكده ..

- اسكت انت .. انا بكلم المقدم محمد اللى عمال يقول تخاريف .. بقى احنا عمالين نثبت فى الناس لغايه مااقناعناهم ان الميه اصبحت شفافه من مجهودات الحكومه لتنقيه الميه ودلوقت عاوزنى اطلع اقولهم لهم الحقيقه ..

- يافندم ومين هيقول كده برضه انا عندى خطه بحث عن نهر النيل وهنفذها فى سريه كامله ..

- فى سريه ؟ 

- طبعا سريه ..

- اتفضل اعمل اللى انت شايفه .. عاوز نتيجه فورا ..

خرج الضابط محمد من مكتب السيد الرئيس .. اقصد رئيسه فى العمل فى هذه الجهة السياديه وكله اصرار ان يجد النيل وقد حدد مجموعة منتقاه للبحث عن النيل فى سرية تامه ..

هو النيل راح فين ؟ ..

فى منطقه بعيد عن المدنية و بالقرب من الحدود الدوليه كان بعض المهربين يقومون بعملهم فى همة ونشاط حين رأه احدهم ..

كان يقبع فى حفره عميقة يبكى .. فصرخ بأعلى صوته ..

-  سعدون الحقنى تعالى بسرعه .. بص لقيت ايه ..

- ايه البحيره دى .. مكانش فيه بحيره هنا ..

- دى ميه حلوه .. ده نهر النيل يامعلم ..

- نهر النيل ؟ .. احنا نبلغ البوليس ..

- هيقبضوا علينا ..

- ويقبضوا علينا ليه .. احنا مهربين مخدرات شرفاء مالناش فى تهريب النيل دى امن قومى ..

وفى احدى مبانى احدى الجهات السيادية كانت الحركة متوترة جدا حتى دخل سيادته فقام الكل وفى حركة عصبية يؤدون التحية ..

- حد اخد خبر ..

- لا يافندم محدش عرف حاجه غير المجموعة المهربين اللى لقوه ..

- محدش يخرج من هنا غير لما نعرف الحقيقه ومين ورا اختفائه ..

- والناس يافندم يشربوا ايه ؟ ..

- خليهم زى ماهما لغاية مانعرف الحقيقة ..

ظلوا اياماً يحاولون مع النيل معرفة الحقيقة وفى كل مرة كان يقول قولا واحداً ..

- عشان الزباله اللى بتترمى جوايا ومخلفات المصانع وكل من هب ودب بيعملها فىَ .. انتوا ماتستحقونيش .. ده اى دوله لو عندها ترعه صغيره كانت اهتمت بيها وانتوا منتهى ال ... انا لو حد قرب لى هبخر نفسى ..

- الدوله اكبر من اى تهديد ..

خرج السيد المسئول وقد امر كل القياده بالقيام بعمل " الجلاشه " مع النيل حتى يعترف بالمحرضين والدول التى وراء هروبه من ارض الحضارة ..

الجلاشه ..

فى كل مره كانوا يقومون فيها بتعذيب النيل وقد تفتقت اذهانهم عن فكره البستره لتعذيبه .. فكانوا يقومون بتسخينه لدرجه عالية ثم ياخذونه للثلاجات تحت درجة حراره اقل من 20 تحت الصفر حتى يعترف ..

- مين اللى خلاك تعمل كده ..

- طول عمركم بتلوثونى..

- بتشتغل مع مخابرات انهى دوله ..

- انا معرفش انت بتتكلم عن ايه ..

- ماهو انا مش هرحمك ولازم تتكلم ..

- اقسم اننى لن الوث ماء النيل .. راح فين القسم ده ..

- اقسم بالله ماهتخرج من هنا الا اما تعترف .. انت متعرفنيش ..

اقتحم الغرفة قائده وهو يصرخ فيه ..

- انت بتعمل ايه ياابن انت ..

- بحاول يافندم اخرج منه الاعتراف ..

- وانت بالهبل اللى انت بتعمله معاه ده مش مدرك انه ممكن يموت فى ايديك .. قصدى يتبخر .. انت مش شايف انه خس ..

- يافندم ...

- هتودونا فى داهيه ..

صمت الجميع وعيونهم فى حيرة من امرهم ..

ترى هل سيعود النيل الى مكانه ليشق وادينا كالسابق ..

ترى هل سيستمرون فى تعذيبة حتى يتبخر وينتهى امرة ..

ام اننا سنقسم اننا لن نلوث ماء النيل مرة اخرى ويعود بهاء كيميت كما كان ..