افتح يا ابنى محضر لهذا الشعب .. لأنه انتحل .. صفة البطل .. ولسه عنده أمل .. ولسه عنده قلب

الشعب المصري

شوهد مشدوهاً - لابس جلابية –

لا يحمل معه - تحقيق شخصية

بسؤاله ... أجاب :

زعلان اكمنى - قد قمتُ بثورة –

خطفوها منى - أصحاب الثروة

الشعب المصري محجوز فى القسم

الشعب المصري خدوا منه الاسم

بقى اسمه الناس - أفراد الأمه –

بيصلي الجمعة –

ويروح ينداس - فى طابور العيش –

ويعيش يتصارع - راح منه العقل –

بقى رجل الشارع – محدود الدخل

الشعب المصري

راح السعودية - جه م السعودية

ومهاجر كندا –

وامه على الكنبه - وأبوه بعباية –

قدامهم كنكة - حاضنه سيبرتاية –

ويقولوا يا رب – يحميك يا ضنايا

الشعب المصري

يجرى و يزك - فرحان وتعيس –

يركب توك توك - يركب سيرفيس –

زعلان مبسوط - بيعيش ويموت –

ويموت ويعيش –

يفرح بولاده - لابسين تلاميذ

الشعب المصرى

أرضه وسماه - عايشين وياه –

صوته فى غناهم - صوتهم فى غناه –

بدموع مبتسمه – بالضحكة الراسمة –

تواريخ الآه –

الشعب المصري - رزقه على الله

يا خريطة مصر

يا نيل ويا صحرا

يا صلاة العصر

يا صيام العدرا

يا صيام رمضان

وقيام لياليه

يا شهيد الثورة

يا دموع أهاليه

يا مقيم الدعوة

يا محامى الخصم

يا رئيس الدولة

الشعب المصري محجوز فى القسم.