(إلي العم صلاح چاهين في ذكرى رحيله في مثل هذا اليوم سنة 1986) 

الحزن تالت تلاته ولاّ رابع أربعه 

راجع يرُصّ دموعي في المطبعه 

إديني لحظة أمان آخد نَفَس وارتاح 

الشعر طير جناحاته متفزّعه 

مين زعّلك 

جنس مين يقدر يا عم صلاح 

حقك عليّا 

حقك على ايديا اللي قاعده مربعه 

الحزن تالت تلاته ولاّ رابع أربعه

. 

الحزن تالت تلاته قعدوا ع القهوه 

بيغنوا مصر فْي شارع الشريفين 

فاتحين قميص الشباب للشعر والنشوه 

ندهوا عليا وقالوا : رايح فين 

فجأة.. وبصوا لبعضهم الاتنين 

وطاروا علي سهوه 

فجأه.. لقيتني كإني بين شطين 

مركب قلوعه ممزّعه 

الحزن تالت تلاته ولاّ رابع أربعه 

. 

الحزن تالت تلاته ولاّ كانوا اتنين 

زي الإيدين والنسمه شايلاني 

تاني جناح انكسر 

إزاي اطير تاني 

يا مضيعاني في الرياح الأربعه 

كل الدموع القديمه فْي قلبي متجمّعه 

اتنفسيني 

اتنفسيني يا بيوت مصر اللي مش عارفاني 

يا مسفراني بقطرك العطلان 

ومغمياني بطرحة الدخان 

ومخوفاني  

باحط إيدي علي الدموع واحلف 

إني مش زعلان