طالع من التكعيبة ميت عنقود

ببيجامة واسعة وكم متشمر

طالع من التكعيبة لون أخضر

ورق العنب مليان روايح

يوم التلات في المدرسة

يوم الخميس مش رايح

وما كنتش اعرف إنها حتروح

يوم الخميس فارشين في وسط السطوح

قاعدين في ضل الشمس

وبعيدة عن قلبي الجروح

يوم الخميس مسموح

بتلمنا ..

وتلم حواليها الطيور الضعيفة

زي الملايكة المخلوقات م النور

وما فيش مغص ..

وما فيش في قلب الدنيا شيء مكسور

تضحك بسنة وتبتسم بكسور

تنده علينا تلمنا ..

علشان توزع قلبها بالدور

أسطورة منقوشة ف سحابة

أسطورة غطت ع السحاب الغيور

من شمس مصر وضلها المنشور

من كل ناحية اتفرعت

واتوزعت الايام في قلب الشهور

وبقينا في سنين الشبه والغل

من غير سقوف ولا ضل

من غير شقاوة وعفرتة وأنيس

تحت الشجر فوانيس

وشموع بترقص في سحور رمضان

والليل بطل راكب حصان

بيلف بيه ع القاهرة النعسانة

شايل صاجات الكحك والبسكوت

زغروطة يا ام فلان

ويا ام فلانة ..

إبنك رجب راجع معاه قمصان

م الشفتشي الاحمر ..

وبالألوان ..

إبنك رجب راجع في قلبه الحنان

واتربى م الغربة ..

إكمنه عاشر قسوة الأغراب

واهو جايني يجري يدق فوق الباب

وافتح له صدري ..

يدخل في حجري ويبقى من تاني

أصغر ولادي التلاتة

بافرح قوي لما اشوفك

بافرح قوي لما اعيط وانتي شايفاني

لكن .. بموت .. وحدي .