تكبير الخط تصغير الخط

خووود ياض ... قفشتك ... انت بتعمل ايه في صفحتي ... بتلف وبتدور علي ايه في الصفحة هو انت ياض مش بعت ولاد اختك البنات يشتموني في ال other وانت داير عالصفحات تشتمني وتقول عليا كاتب شعبوي ولا يجيد استخدام التورية والتناص ... تناص هو ده تناص وده تناص وكل ديه تناصات  ... ايواا يا سيدي انا كاتب شعبوي ... طبيعي اني اكون شعبوي ... واحد زي بيعتبر عم فرغلي بتاع البطيخ اللي علي ناصية شارعنا هو أهم مصادري للاطلاع علي اخبار البورصة واسعار البرنت والخام والأسواق العالمية لاستكشفات الغاز الدولية ومصادر الطاقة ...واحد زي لما بيحب يدلع نفسه بيخطف رجله لغاية بجة في الناصرية وعلي سمفونية ضربة المعلقة في طبق الشوربة وازيز قطعة الكبدة تحت اسناني اسمع من عمال بجة عن رحلاتهم للفورسيزون بتاع الحاج هشام طلعت مصطفي وال full board في اوتيله ... اسمع منهم عن رحلات الحج والعمرة التي ينظمها لهم المقدس نخنوخ ... ايووون انا شعبوي ومثلي الاعلي وسيدي وتاج رأسي عم خليفة بياع الفول في شارعنا .. شارع العطار في شبرا ... عم خليفة عربيته مختلفة عن كل عربيات الفول في بر مصر ... عربيته بيجرها حمار ... عم خليفة كفيف ... اكلت المياه البيضاء التي سرعان ما تحولت الي مياه زرقاء عينيه الاثنتين ... يخرج بعد الفجر بالعربية والحمار من بيته  في الاميرية ومنها حيث المستوقد في مسطرد  ياخذ قدرة الفول ويسوق العربية بالحمار والحمار عارف طريقه ... يمر من علي كمين المؤسسة وكمين كوبري عرابي وكمين عبود ويصل الي آخر شارع احمد حلمي ويعرج علي شارعنا .. شارع العطار... ويدخل حارة احمد السيد يخفي الحمار خوفا من البلدية ... مش مهم قدرة الفل ولا العربية ... اهم حاجة الحمار هو عينيه وسنده وعكازه... طب بذمة ابقي شعبوي وأصدق عم خليفة ولا اصدق كل سياسي الانظمة والمعارضة العربية ... مرة حاولت وانا صغير اعمل نفسي صحفي شاطر واعمل ريبورتاج عن عم خليفة وصور وأحاديث واعمل خبطة صحفية ... الراجل بص لي بعتاب وقال لي ... ماتفتحش عينهم عليا يا سيد يابني ... خلينا كده ناكل عيش وناكل الحمار ... 

ثم يا اخي هو نجيب محفوظ لما كتب الثلاثية كان شعبوي ... طب محمد عبد الحليم عبدالله لما كتب الشارع الجديد كان شعبوي ... عبد الحميد جودة السحار لما كتب تنائية ام العروسة والحفيد كان شعبوي ...

_ ليه هو انت فاكر نفسك نجيب محفوظ

_بص ياض اه انا شايف نفسي نجيب محفوظ والسحار وعبد الحليم عبدالله وعزيز نيسين والبير كونتي واحسان بس عمري ما شوفت نفسي مصطفي محمود ولا أنيس منصور ولا حتي توفيق الحكيم ... عارف ليه ياحمار لاني عمري ماحستهم ... ثم انت زعلان ليه ماهو الرواية والمجموعة القصصية موجودين في دور النشر ونازلين قص ولزق وتفصيل فيهم عشان يبقوا علي مقاس دماغك يابطيخة ... يابني ابعد عني احنا جيل شاف الويل جيل كان بيعتبر مصطفي بكري مناضل عظيم وكان بيعتبر ابراهيم عيسي المهدي المنتظر ... احنا حفرنا الصخر لنصل للحقيقة ... حقيقة ذواتنا ... اما بخصوص التورية ... التورية كيف لي أن أكتب بتورية وكل شيجن انكشفن وبان ... كله واضح .. واضح وضوح الشمس ...تورية ليه ... وبأمارة ايه ... ياض ده ابي احمد بيقولك هيبني 

مائة سد ... تورية بعد ما الريس طلب من رئيس الوزراا البركة الطيوب الكيوت المهاود ان يبني الإنسان المصري  ... بعد حكمه لمدة ثمانية سنوات تذكر الريس أن هناك مواطن مصري لابد من بنائه ... اومال الريس كان بيبني ايه طوال سنين عمر حكمه الثمانية الماضية ... كان بيبني مجانص وترابيس وسمانة مثلا ... تورية ليه ده قطر طلعت مش بنت وسخة ... تورية ازاي واحنا عندنا المتهم بالقتل بيتقبض عليه وتحقق معه النيابة ويتحول للمحكمة ويخلص كل درجات التقاضي من استئناف ونقض ويتحكم عليه ويطلع في سنتين ... اما المعتقل السياسي فيتقبض عليه ويجدد له الحبس كل ٤٥ يوم لغاية ما يخلص سنتين وهي مدة الحبس وفقا للقانون سيئ السمعة والصيت ( الحبس الاحتياطي ) وبعد كده يطلع ... لا ابدا ... بندوره في قضية مفبركة جديدة ... تورية ازاي لا مؤاخذة  وعمرو اديب ركب مع العفش في موكب المخابرات المصرية الي غزة عشان ياخد اللقطة ويتصور جمب ابو العبد إسماعيل هنية ... تورية واحمد موسي بيقولك .. اتوق ان استشهد علي أعتاب الاقصي .. احمد موسي اللي ربنا ان شاء الله مش هيدخله جنة ولا نار ... ربنا بمشيئة تعالي سيتركه هكذا في الصحراء اللامتناهية بين الجنة والنار كالكلب الجربان ... اللي داخل النار يتف عليه واللي داخل الجنة يطلع له لسانه ... تورية بعد ما قردغان أصبح بقدرة قادر الرئيس اردوغان ...

فهمت ياض ... ياللا خد باب الاكاونت في ايدك واوعي تدخل صفحتي تاني وقول لبنات اختك يبطلوا شتيمة في ال other  لحسن انا في دماغي كلبين ملظلظين لو طلعوا عليهم هيعضوهم في التوتا ... ومتنساش تسلم لي علي امك ... ازيك وازي امك