شماشرجية النظام 

وشماشرجية الإعلام 

وشماشرجية الكلام 

 وشماشرجية بكام

وكل الشماشرجية حريفة تدوير الأحلام.

_

صاحبي اللي صاح بي

وهانت عليه روحي

جرحني وطاح بي

وقع مني ع الأرض

خفت ليلْسَع الناس الحافيين 

دوست عليه فانطفى

راكب حصان الوهم مستني الغروب

وحلمت على صِدْر النبي يمكن يتوب

صورتك فـ عينيها لحضرتك مصلوب

صورتك في قلبي يا غبي عِدِل 

ليه خليتها بالمقلوب ؟!

شوفتك بعين الحضْرَه صحابي

شوفتك بعين الحسره أيوب

اعملني فاصله في دفترك

واعملني خُصله اتمخطرك

دانا زمزميه فـ مُعْتَرَك

هعفق مقامك وهوتَّرك 

يا أشَطَّرك يا أشْطُرَك

جملك ما عدش يودي الغلة للنورج

جملك برك

نكراك يا واد لكن

عينيها ماريداش البعاد

نسياك يا واد

ولو أنت نادره مش هتنعاد

يا تلبس الجلابيه متقطعه

يا ألبِسَك توب الحداد

يا ضحكتك اللايْحَه ببنُودها

منتاش داودها لكنك النجمة

وطمعان في نعجة أخوك 

وسنين عاشق سجودها

لكنهم في الصلاة نسيوك

أنت اللي داخل مفلس في المزادات

وأنت اللي علِّمْتَها إن السما مش فوق بعضها

السما مدقات !!

ونَفَس الأوليا هيتجدد فـ روحك بالزيارات

ونن عينها كان بيروحَنَك مسافات

فَتْفَوَّقك بالقِبلة رافعة علم لبنى

فينكشف جُبنك ويتملح جبني

يا ابني .......

السهم اللي صابك 

كان قبل منك صابني

وحق من نشاني وصلبني

وخلاني قلت لك يا بني

أنت نسيت العروسة

وبتدور على كُلْفه للفستان

احلف بقرآني وحق من فَرَقه

واحلف برب جاليليو والنجمة سبب حرقه

إن كتاب العشق اللي معاك

مش بتاعك .. أنت سارقه !

وأهيه

الحقيقة واضحة وضوح اليهود

من غير خشى ولا خوف

ولا عبد ولا معبود

وعلى عينك يا نيل

رافضة تشوف كراسة شروطك

قولتلها بحبك

رسمت عينيها تابوتك

رشقت سهامها اتبسمت

رفضت شطوطك

يا إمَّا تتعب معايا فـ طلوع النخيل

يا إمَّا لا هعيشك ولا هموتك

وأنا اللي فاضل لك

وفـ جُعبتي شمسك وضلك

عايزني أضلك مش هـ اضلك

أنت الوحيد اللي بتنقَّط الرقاصه

رغم إنها ليلة لأهل الله

وشئ لله يا أهل الجاه

مش جيلك م الفجر يا ست

يا واد ... يا وادي

الرب ماكلمش موسى بس

الرب كلم كل الناس في عينيهم

الله جواك بس أنت تحس

الرب بإيده حط العيش للناس فـ إيدهم

لكن أنت عينيك سابقه على إيد الناس

خايف ترمش وكأنك تمثال عبد

مانتش جدير بتكريم الشروق

مانيش شماشرجي

ومانتش فاروق

يا تفوق يا صاحبي يا إمَّا تتغمى

يا إمَّا تروق

يا صاد ياسينك انظلم

يا نون وحاضنة في القلم

يا فاطر على حلمي معايا

والواقعة إنك بتهدني

وأنا بابْني فيك

افتح لي بابك حِجِّني

جايلك طلوقه ليه بعتني

مانتش رخيص يا طمي

هي العيدان العمي

راشقين جدورها فـ جتتك

وبيملسوك بالميه بتفتتك

ومن مرارك تمر!

ندهتلك بلد .. وشمس .. وتين

ندهتني صمت .. وصنت .. وشين ‍!

روح يا حزين

وشوف مين بعدي

هيمَلِّكك فـ قلبه شبرين ؟؟؟

....

من ديوان - فسر يا يوسف - سامح ال علي