تكبير الخط تصغير الخط

كل ما أشوف أي عمل فيه صبري فواز أو زي ما بيحب يسمي نفسه #الصابرالفواز .. حتى لو كان جاي ضيف شرف بتأكد إننا قدام ثروة فنية كبيرة جداً وكنز فني ثمين لم نكشف منه إلا أقل القليل أوي جداً خالص يعني ...

احنا بنتعامل مع شخص الموهبة بتشع من كل حتة فيه ... معجون موهبة .. بيمثل بكل حواسه .. لو طلع في مشهد صامت هنلاقيه بيمثل بنظراته وبيطلع لنا أعلى أحاسيس ممكنة لا دا ممكن يوصلنا جمل حوارية بنظراته بس ...
#صبري_فواز من الناس الي تعتبر جوكر في أي عمل هو موجود فيه ...
حبيت أتكلم عنه دلوقتي بعد انتهاء الموسم التاني من رائعة #محمدأمينراضي مسلسل #مملكة_إبليس
وصبري فواز بقا هو إبليس اللي المملكة متسمية باسمه ...
فتحي إبليس قدملنا في الموسم الأول حلقة واحدة فقط لا غير هي الحلقة الأولى وما ظهرش تاني إلا في لقطة واحدة في الحلقات الأخيرة من الموسم دا ..

 ومع كدة فضلت الحلقة الأولى دي معلمة معانا لغاية الحلقة ١٥ والأخيرة من الموسم الأول ...
عارف حضرتك يعني إيه شخصية تظهر لمدة حلقة واحدة وفي وسط كل كاست الممثلين الكبير جداً الي في المسلسل الي كلهم عملوا شغل عالي جداً جداً بالمناسبة بس مع كدة يفضل فتحي إبليس معلق معاك وحاضر معاك ومستني يمكن يظهر في أي لحظة أو أي مشهد ؟؟
عارف سيادتك يعني إيه ممثل يعمل حلقة واحدة في مسلسل كامل ويختفي فيفضل موجود معاك وإنت بتتفرج على كل مشهد في المسلسل ؟؟
عارف معاليك يعني إيه فرحتك بالإعلان عن الموسم التاني للمسلسل وتبقا مبسوط إنك هتكمل مسلسلك الي إنت متشوق تعرف نهاية أحداثه تبقا الفرحة دي كلها في كوم وفي فرحة تانية أدها أو أكبر منها شويتين تلاتة أربعة في كوم تاني كدة لوحدها لما تعرف إن الممثل دا دوره مكمل في الموسم التاني ؟؟؟
عارف حضرتك إيه دا ؟؟
دا #صبري_فواز ببساطة يا أفندم ...
السهل الممتنع الي بيرمي الجملة بكل تلقائية في شوط في مسلسل أو فيلم فتفضل معلقة معاك سنين وسنين ...
أنا يا بنتي ؟
جمل يا آبا الحاج
دول جملتين قالهم #الصابرالفواز في فيلم #كلمنيشكراً سنة ٢٠١٠
واحنا حاليا ما زلنا بنستخدمهم كإيفيهات وبنعمل بيهم كوميك في ٢٠٢٠ ...
الممثل الي جمل في مشاهد ليه عايشة بقالها ١٠ سنين ومكملة ...
مدرك حجم الموهبة والتلقائية الي بنتكلهم عنها شكلها إيه ؟؟!!
وكأن كل واحد اه من إسمه نصيب فعلاً فالرائع #صبري_فواز ليه فعلاً من اسمه نصيب لأنه صبر كتير أوي بجد ...
ذلك الممثل الرائع الموهوب بدأ مشواره من سنة ١٩٨٨ قدملنا ما يقارب من ٨٧ عمل ...
اشتغل واشتغل عشان يلاقي الفرصة المناسبة الي يعلن فيها عن وجوده ... عن وجود موهبة عظيمة حقيقية ... فرصة يقول فيها أنا أهو موجود ...

أنا الممثل الفنان الموهوب المتمكن الي قادر يلعب كل الأدوار والشخصيات بكل براعة واتقان ...
أنا الي معجون موهبة وحرفية ربانية كدة ... أنا الي عندي القدرة أخطف الكاميرا في أي شوط أنا متواجد فيه ...
مين ممكن ينسى زهران في الوسية .. شريف في الحلمية .. فتوح موظف الصيدلية في إمرأة من زمن الحب .. بليغ حمدي في أم كلثوم .. عيسى في البر الغربي .. ؟؟؟
وبعدهم الدور الي لمع فيه بجد في مسلسل الأصدقاء ... محرز طنطاوي تلميذ الدكتور عزيز محفوظ ووريثه ؟؟؟؟
الدور دا كان بيعلن عن نجم حقيقي ... لكن برضه تتأخر الفرصة ...
ويكمل الصابر مشواره ...
ويلعب دور بليغ تاني في فيلم حليم ودور الظابط في عصابة الدكتور عمر وبعدين يقدم دور من أجمل شخصيات ملحمة المصراوية دور بشير السخاوي ...

 ويرجع بعدها لظابط خفيف الظل في الدادة دودي ...
كأنه بيقول أنا لعيب تمثيل تقيل أوي بعمل كل حاجة وبلعب كل الألوان ...
ويكمل الصابر مشواره ...
لغاية ما تيجي فرصة أكبر في دكان شحاتة .. طلب الأخ الكبير لشحاتة ...
لغاية الظهور الي اتبروز بقا وعلم مع الناس وقال للجمهور ولصناع السينما أنا أهو بقا ...
عرابي في كلمني شكرا ...
والتألق بقا في شخصية جودة في كف القمر ...
وبعدين بداية مشواره مع محمد أمين راضي ودور سليم عثمان في نيران صديقة ومحمود ابن سيد نفيسة في السبع وصايا ومولانا الضوي في العهد...
والروعة في الأداء في شخصية الكاتب محمد حسنين هيكل في صديق العمر ...
والعبقرية في دور كرم يونس في أفراح القبة ... ومحروس في بين السرايات ...
و خميس في رمضان كريم ... والشيخ مصطفى في جواب اعتقال ...
وبعدين الأداء الي بمزاج عالي أوي بقا في أيمن وكمال واصل في الحصان الأسود ...
وسنة التألق ٢٠١٨ في دور عماد في رحيم ودور الشيخ في أبو عمر المصري ...
وبعدهم عظمة الأداء في سعيد قيد عائلي ... وأخيراً وليس آخرًا فتحي إبليس في مملكة إبليس ...
وبعد الصبر دا كله فعلاً فاز ... فاز بحب الناس وبالنجاح والتألق والمكانة الي برضه لسة أقل بكتير من ما يستحق ...
وفعلاً هو #الصابر_الفواز ...
وأنا بتفرج على فتحي إبليس اتأكدت إننا لسة ما شفناش من الموهبة العظيمة دي إلا أقل القليل
وإن لسة عنده كتير أوي يبهر بيه جمهوره ويسعده بيه ...
إنه #صبري_فواز يا سادة ...