دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

---------------

 يا دمعتين نازلين

على وطن متهان

يصرخ و لا سامعين

كأنهم من غير ودان

مع انهم عارفين

مين اللى باع

و مين اللى خان

ومين اللى صان

يا فجر امتى الادان

م المادنة حتى الميدان

يروى غيطان الروح

يعبر جراح و جروح

و يداوى حلم السنين

من الأنين للحنين

و يلبى كل الندا

النور ينادى الندى

و الصوت ينادى الصدى

نرفع رايتنا لفوق

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف آه يا عين

 لافقدت فيكى الإيمان

و لا كنت يوم كافر 

ليه قاسية ع المؤمنين

و رحيمة ع الفاجر 

حنى بقى و اعدلى 

وصلت قلوبنا الحناجر 

ومهما زاد العناد

لكل فجر معاد

مسحراتى بطول البلاد

أصرخ ليلاتى 

إصحوا و فوقوا

لكل آتى

رمضان كريم

شهر و عظيم

فيه العظات و المعجزات و الإنتصار

الفجر لازم يولد نهار

و الصبح مولود من نور و نار

مسحراتى و ف إنتظار 

الأمة ترفع راية إنتصار

رمضان كريم

يا نايم إصحى

وحد الرزاق