يا مصر قومي وشدي الحيل

كل اللي تتمنيه عندي

لا القهر يطويني ولا الليل

آمان آمان بيرم أفندي

رافعين جباه حرة شريفة

باسطين أيادي تأدي الفرض

ناقصين مؤذن وخليفة

ونور ما بين السما والأرض

يا مصر عودي زي زمان

ندهة من الجامعة وحلوان

يا مصر عودي زي زمان

تعصي العدو وتعاندي

آمان آمان بيرم أفندي

الدم يجري في ماء النيل

والنيل بيفتح على سجني

والسجن يطرح غلة وتيل

نجوع ونتعرى ونبني

يا مصر لسه عددنا كتير

لا تجزعي من بأس الغير

يا مصر ملو قلوبنا الخير

وحلمنا ورد مندي

آمان آمان بيرم أفندي

يسعد صباحك يا جنينة

يسعد صباح اللي رواكي

يا خضرا من زرع إيدينا

شربت من بحر هواكي

شربت من كاس محبوبي

وعشقت نيل أسمر نوبي

وغسلت فيه بدني وتوبي

وكتبت إسمه على زندي

آمان آمان بيرم أفندي

  وداعا نجيب الدين شهاب