بمناسبة ان النهارده الجمعة

مجدي أحمد صادق .. ربنا يفك أسرُه...

في يوم كنت قاعد أقرا في رواية (إسمها تريند) رواية أوصي شباب الجيل دا كله يقراها )

المهم

مجدي نادا عليا ودار النقاش بيني وبينه كالآتي

_رديني قوم إعملي قهوة سادة

إيه ياض انت البجاحة دي انت عارف انا اكبر منك بكام سنة ، ازاي تتجرأ وتقولي انا اقوم اعمل لجنابك قهوة وكمان سادة

_قوم يارديني اعمل قهوة وهالاعبك شطرنج

بس كدا ، دا انت تؤمر ياسي مجدي بيه

عملت القهوة وروحت قعدت جمب مجدي وبعد ماحطينا الشطرنج ولعبنا شوية قليلين النور قطع

ساعتها مجدي قالي عرفت ليه بشرب القهوة سادة ياعم الشاعر 

المهم

قولتله طب لحد ما النور ييجي يامجدي

عايز اسألك شوية أسئلة

إنت زعلان انك اتحبست ؟!

قالي بص هو انا متضايق اني اتحبست

بس الاعتقال دا ليه فوائد كتيره اوي يمكن انا مجدي قبل الاعتقال غير مجدي دلوقت أضفت لنفسي خبرة في الحياة لو انا برا مكنتش هاتعلم الأشياء دي لو بعد ألف سنة

طب استفدت ايه من السجن يامجدي؟

انا استفدت اني اكتشفت اني باحب ابويا وأمي جدا بطريقة رهيبة

وباحب أخواتي جدا

بس اكتشفت كمان اني مقصر معاهم جدا

واني ضيعت وقت كبير اوي كان المفروض يبقى ليهم

اكتشفت صحابي الجدعان الرجالة

واتعرفت على ناس حلوة جدا هنا

قريت هنا كتب مالا يقل عن ٤٥٠ كتاب

شوفت افكار رائعة وأيديولوجيات مختلفة منها اللي يستحق التدبر ومنها المرفوض جدا والمتطرف

بس انا يارديني لسه شاب في أول سلالم الشباب ، لما اتحبس كدا بدون تهمه وبدون دليل لو فيه تهمة ، روحي بتتلوث

لكن الحمد لله اني قادر احافظ على روحي لحد دلوقت

أنا شوفت عيون مجدي بتطلع شرار من الحزن ،

لما اخته نجحت في الثانوية العامة ..كان راجع من الزيارة وقالي وكان فرحان اوي

بس لما قعد بالليل

قاللي كان نفسي يا اخي اروح اوديها الجامعة أول يوم

كان نفسي أكون جمبها ..

مجدي أول يوم عرفته فيه في المعتقل

كان مختلف جدا عن اخر يوم سيبته فيه

أول يوم شوفته .لأننا تقريبا اتحبسنا في نفس اليوم

ماكنتش طايقه

وقلت له كدا

قولتله تعرف يامجدي .. انا وانت بننام على فرشة واحدة وقاعدين ٢٢ ساعة في وش بعض .. لكن اول يوم شوفتك فيه

كنت بني آدم تاني

كنت تحسك كدا متغطرس 

رد عليا مجدي وقالي

وإيه كمان ياعمو رديني

قولتله دلوقتي

أقسم بالله يأبني باحسك ابني

مجدي أهلاوي وأنا زملكاوي

كنا مش بنختلف غير في النقطة دي وبس

وبصراحة لما النور جه

مجدي بص ع الشطرنج وقال

ايه دا الوزير فين ؟

قولتله انت هتستعبط ، انا واكل الوزير من زمان وهو صدقني

انا استغليت ان النور قاطع وخدت الوزير حطيته بعيد

وساعتها مجدي ماخدش باله

لما يطلع ويشوف البوست دا هاينفخني

مجدي كان بيصلي ، وكان بيقرا كتير ، وكمان بدأ يكتب، وللعلم مابيتكلمش في السياسة أصلا ولا بيفهم فيها ،، مع إنه مثقف

مجدي شخص مؤدب ، ومتربي أوي

كان دايما بيحترمني وبيسمع كلامي

ولما اسأله عن السبب بيقولي معرفش انا بحبك كدا دون سبب وباحترمك رغم اننا مافيش بينا حدود

مجدي كان دايما سندي في اشياء كتير ومن الشخصيات الجميلة

إنسان بمعنى الكلمة

مجدي أحمد صادق بعيد عن اي افكار متطرفة أو الإنضمام لكيان سياسي أصلا وانا اشهد له بحبه لبلده

هو كان شاب عادي جدا ومعتقل عن طريق الخطأ حاله حال ناس زيه

لكن أنا أملي في الله أولا وفي الجهات القضائيه والقضاء المصري أن يرأف بشخصية زي دي

شاب مصري في كلية حقوق

ووالده الفنان القدير أحمد صادق

ممثل قدم لمصر أعمال تليفزيونية وسينمائية ومسرحية لها باع في إثراء الثقافة في مصر وسيطه واصل للوطن العربي كله

رجل طول عمره وطني وبيحب البلد دي

الفنان أحمد صادق لما كلمته كان في صوته نبرة الأب الحزين على ولده

وتعب جدا أثر وعكة صحية كادت تودي بحياته لولا لطف الله بينا وبإبنه المعتقل

رجعوله مجدي

رجعوا لنا شاب طيب جميل وخلوق وصادق وخفيف الروح ، وأبوه عرف يربيه

رجعوا لنا أخ وصديق واحنا مش عايزين حاجه تاني من الدنيا

#الحرية_لمجدي_أحمد_صادق