الجواب ده اتأخر سنة تقريبا

جواب لليلى سويف

والناس مشاوير

فيهم اللي يكمل رحلته بيك

وفيهم اللي يكعبل خطوته فيك

وفي باقي الرحلة

صدقني 

ما بتلقى صاحب 

يسند تعبك

غير رجليك

غير أفكارك

غير قناعاتك 

اللي عشانها بتكمل مشوارك

مهما يكون الحزن ماليك

ليلى سويف

لو كان فيه م العدل شوية

كان اختارك رب الناس

للصبر نبية

بس ايوب كان اسبق منك هو ناعسة

حتى الدنيا لما بتضحك 

ليكي بتيجي 

بضحكها ناقصة

ويمكن كارثة

علشان كده بنزود فوق الضحكة

نكد ودموع

وبنقطع دايما تذاكرنا رايح بس

وكأنه 

مفيش في السكة تاني رجوع 

معلشي

جيت اسند بجوابي حمولتك

خدني اليأس

كتبت قصيدتي

وسيبت قصيدتك

نقطة ونرجع تاني لجوابنا 

عايز اقولك حاجة غريبة

اني لاول مرة باكتب فيها جواب

مش لاصحابنا

بس بقالي فترة بافكر 

اني اكتبلك 

ان كلام الدنيا ما يقدر يوم يوصفلك

ولا مجازات الشعر بحالها

مهما اتكتبت فيها صور عن ناس ابطال

انها تقدر يوم توصلك

الشعر يا ام المساجين

ما بيترصش وزن وقافية

ولا يوصف الناس بالعافية

الشعر زي الاحلام

عمر ما يحلم نفس الحلم بيه اتنين

وانتي قصيدة 

لما نقولها

بتقوينا سنين وسنين

بتسمعنا صوت احلامنا

لما بتحبسنا الزنازين