البنايين

. 

مسحـراتــي وصنعتــــي بَـنّــــــا 

وارث جدودي من قديم العصور 

نبني في مصر وبالتراب نتحَـنّى 

يا كـل طير ع الغصـن لـو غـنّــى  

وعلــم الإنسـان ينـــادي النــــور 

.       

أول ما كانوا البنايين في الدنيـا 

كانوا الطيور 

وانا كنت أول صبي 

صلوا معايا علي النبي 

أول مِعلــم ليّـــا كـان عصفــــور  

بنى لوليفه عش 

من الغنا والقش 

وقاللي إوعى يا واد تكون مغرور 

بيت المحبه

إذا حبه حبه، ما اتبناش 

عمره ما يعلاش 

دا الباني طالع..

واللي فاحت ماجاش 

. 

صلوا معايا على الرسول الكريــم 

آدي اللـــي علمنـي البنــا والغـنـــا 

أبنـي بيـوت أحبـابي طـول السنه 

وارجع أسحرهم فى ليل رمضان

. 

يا سلّمه على سلّمه 

ميـة عرقنــا معلمه 

على الحيطان 

بتقول وكان يا ما كان 

البنــاييــن فـي القاهـرة بيـبنــوا 

وكــل ميــن واخـــد وراه ابـنـــه 

ع السقـالات بيشـيــل وبيـنــاول 

ويعلمــه علــى المحبــه يقـــاول 

يبني معـاه مِدْماك 

فوقه كمان مدماك 

ولمــا يعلــوا لقـاعــدة الشــبــاك 

يقولله: شوف يا ابني 

عَمار يا مصر

.

يا غنــوة القلـــب اللـــــــي متلحَّــنه 

يا كــــل طوبــــه نفســـــها تتــــبَـنَى 

قلـب المغنــى طــار علــى المئــذنـه 

يقول: عَمار يا مصر 

.

يا كــل بــــاب يفـتـح لــى ويـرحّــب 

أنــا قلبــى لا بيـرتـــاح.. ولا بيتعـــب 

نــزل الحمــام علـى سطحنـا يشــرب 

ويقول: عمار يا مصر 

.

لأعيش مُتـيَّــم فى جمـالك وحسـنك 

يا مصر، وابنـى عشى علـى غصنـــك 

وامشى أنادى كإني نايم فى حضنِك 

أقول: عمار يا مصر 

.

يا فجـــر طالـــع والقلـوب شايفـــاه 

سمعــــت طيـــــــره سبّحـــــــت لله 

وبيــــت بيتــرَحَّم علـى اللـى بنـــاه 

ويقول: عمار يا مصر

. 

بالطبله دقه        وبقلبى دقه 

ياللي سامعني   ما تقولش لأ 

. 

طايره البلابـل تغني فوق سطوح المنازل 

فـي كل حبـه على شـرع المحـبه.. تقـاول 

دا اللي بنى مصر كان فى الأصل شاعرها 

عصفـور مـن الجنـه عـامـل بنــا.. ومناول 

.

اصحي يا نايم

رمضان كريــم

.

عمر الصاوي

(من ديوان المسحراتي 1987)