تكبير الخط تصغير الخط

عن رمضان .. وكآبة رمضان من غيرك

يا محمد تاني رمضان من غيرك .. تخيل! العجز هيجنني .. مش بأيدي اعمل أي حاجة أخرجك بيها .. رمضان اللي فات ما كانش يخطر على بالي أن هيجي رمضان اللي بعده وأنت لسه مش معايا .. تخيل اكتر مكان عنيا بدمع فيه ايه؟ السوبر ماركت وحياتك .. مش ادام الشروق والغروب .. عشان أنت صاحب مزاج عالي يا حبيبي .. فاكر لما كنا ننزل مع بعض وتحب نجيب ده ونجرب ده .. بأقف ادام الأرفف والتلاجات وادمع والله وبحس بقهر رهيب وأنا مش عارفة اجيبلك من الحاجات اللي بتحبها .. أكتر حاجة كانت بترفه عنك بعد يوم طويل كئيب في النيابات والمحاكم .. 

فاكر كل رمضان لينا مع بعض من أول لما اتجوزنا .. والديش بارتي العائلي .. وانت بتلف في صمت وتأني بين عشرين صنف وتاخد عينات استكشافية في اللفة الأولى .. وبعدها تقرر تاخد ايه وتلف لفة تانية .. في منتهى التركيز والجدية .. وتقدر تكتب مقال نقدي تحليلي عظيم بعد كل عزومة .. وستات العيلة يحبوا يسمعوا رأيك وتحليلك .. مفتقداك جداً جداً .. البيت لوحدي سنتين ورا بعض في رمضان كئيب أوي يا محمد والله .. ربنا يرجعك ليا .. مش متخيلة عيد تالت يجي عليا من غيرك .. 

يا ترى بتاكل ايه ولا بتعمل ايه .. كل امكانياتك الحالية اكل التعيين والكانتين وسخان المايه .. كل ما احاول اتخيل!! الأذان والفطار والصلاة والسحور .. كله لوحدك من غيرنا .. كله في نفس المكان .. كل يوم .. مش عارفة عارف تكمل ازاي لحد دلوقتي .. ربنا يلهمك الصبر والحكمة .. ويثبتلك قلبك وعقلك لحد ما تخرجلي ..