يا مبتلي القلب 

بحب الوطن

اغفر لنا ضعفنا

شلنا هموم الناس 

من غير تمن

حتى تعب كتفنا

كل الخلايق تنافق

وتبوس بيبان القلعة

إلا ولد كان عاشق

قايد في ضلعه شمعة

لو قلبي كان له ابن

كان يبقى اسمه جمال

وان مرة عيني بكت

هتكون له بس الدمعة

ويطوف كلامي محبة

طرح الشجر كان حبة

كتف الرفاقة حيط

تسند سنينا الصعبة

يا راضيين بالذل

تحرم علي الصحبة

تحرم علي اللقمة

لو متغمسة بالقهر

السجن مش زنزانة

السجن ساجن مصر

الأولة يا جمال

طعم البعاد في الحلق

أمر من الحنضل

والتانية يا جمال

كلمة وقالها الحق

يمهل ولا يهمل

والتالتة يا جمال

لو فيه جمال في الخلق

هتبقى أكيد أجمل

ماشي في حارتنا

من تحت بيتنا

سمعت غنوة

مع ضحكة حلوة

قالتلي اسمك

ورمت لي رسمك

وقالتلي انك

مسجون بعيد

وقالتلي احلف

بالست وزاهية

وأبو المكارم

والست زينب

وأبو الحديد

افتكره مرة 

مرة بقصيدة

حلوة ومرة

لكن سعيدة

أنا شوفت صورتك

قلبي وجعني

كان عندي صاحب

سابني وخدعني

حب بلادي

أكتر زيادة

ومات قصادي

كأنه عادة

وعادة جداً

إن إحنا نحزن

بس قلوبنا

ما تكونشي أجبن

على باب زويلة

شنقوه العساكر

كان لسه صاحي

كان لسه فاكر

بيقول تاريخنا

للي بيفهم 

واللي بيحلم

واللي يذاكر

من مرج دابق

للريدانية

نصبوا المشانق

في الناحية دي

الليل مخاوي

أبو قلب خاوي

وانا كنت ناوي

لما ابني يكبر

أخده الغورية

واجيب له بدلة

زرقا بنيشان

وسيف ونبلة

وكمان حصان

وانقش له اسمه

على باب زويلة

زي اللي كان

اسمه طومان

زي اللي كان

اسمه جمال

سميته باسمك

واديته رسمك

وحكيتلك عنك

سنين طوال

يارب عدلك

رضاك وعفوك

فرح قلوبنا

بخروج جمال

مين قدك انت

ع الخلق أرحم

رمضان كريم

بس انت أكرم