إسحب سفيرك واقلب الكاسه

مش كل حاجه بتيجي بسياسه

في حاجات دواها الطبطبه واللين

وحاجات دواها الضرب يا رياسه

إسحب سفيرك واقلب الطاوله

إنجد شرفنا وهيبة الدوله

النيل دا مش شريان حياتنا وبس

النيل دا أعظم نعمة م المولي

إسحب سفيرك واعدل الكفه

قبل امّا نيلنا دمه يتصفي

أثيوبيا داخله اللعبه بوكاله

لاجل الصهاينه ف نيلنا تتشفي

مات الكلام ع الطاوله واتمدد

مستني إيه لا تلوم ولا تندد

إسحب سفيرك إوعي تتردد

المصري عمره ما خاف ولا اتهدد

إسحب سفيرك واضرب الضربه

مش بالحوار الحل بالحربه

خصمك مقامه الضرب بالمراكيب

مش بالمحايله ع اللي ما اتربّي

إسحب سفيرك واحتمي بناسك

سدد سهامك كلنا اقواسك

إضرب بقوه ضربه في المقتل

إضربها وارفع للسما راسك

إسحب سفيرك بدري قبليهم

من بدري واحنا قبل قبليهم

قبل التاريخ ما يسجل العالم

في النهر لينا اكتر ما فيه ليهم

إسحب سفيرك وابدأ الطلعه

خليني اشوف صواريخك الوالعه

بتقيد في جتة سد أثيوبيا

بتبيد نظامها سئ السمعه

إسحب سفيرك وارفع الدرجه

النيل مابين القصوي والحرجه

من كام سنه بنحل ونفاوض

من كام سنه ولا زاويه منفرجه

إسحب سفيرك واقفل الدايره

علي كل ظالم نيته جايره

قول للي جاي يحرمنا م الميه

زرعتنا خضرا وزرعتك بايره

إسحب سفيرك كلنا ف طوعك

هد البتاع دا كلنا بتوعك

إضرب ما ترحم ضربه في ضلوعه

وقت الشدايد كلنا ضلوعك

إسحب سفيرك واظبط الساعه

كبّرها تصغر كل فقّاعه

لينا عليك عن أرضنا تدافع

وعلينا ليك السمع والطاعه

إسحب سفيرك وانصب الخيّه

وان ضربه خابت تصدق التانيه

والتالته تابته لحد أثيوبيا

ما تقول خلاص حرمت للدنيا

إسحب سفيرك يلا ع البركه

إحنا الوريث الشرعي للتركه

أول ولاد النيل دا من صلبه

إسحب سفيرك وابتدي العركه