قال المديـــــر العبقرى ... للسواقيين و الكومســــرى

عايـــز تسوقوا حِميرى ... و تسبقــوا ظبــــى الفـــلا

--------------

و نشــــد حيلنـــا كلنا .... عشــــان نـــــزود دخلنـــا

و انتم لكم آخر السنه ... مكافـــــأه حلـــــوه للغــــلا

-------------

و نـروح و نـرجع بالعَجَل .. و اللى يموت تحت العجل

مش راح يمــوت ناقص أجل ... و الموت مهــواش معضله

------------

الكمساريــــة يزمـــــروا ... و السواقـــين يتشطــروا

و القطر باللى اتجـــرجروا ... يطلـــع طلــوع القنبـله

-----------

ناس تتهرى و ناس تنسلخ ... و ناس عظامـــها تتملخ

و ناس دماغـــها تنشدخ .... و لا ضحــايـــا الزلزله

-----------

مديرنــا يعمــل حسبته ... و يشوف حماقـــة شركته

ميت مَركَبــه فى سِكتـه ... سبـــع ساعــات متعطــله

------------

لو كان مديـــــرنا يركبــــه ... أقلــــــه كان يهــــذبـــه

أو تحت منــــه يقلبـــــــه ... و ننتهى م المســـــأله

بيرم التونسي.