المسحراتى :- " المجد للى عبروا .. و العار على اللى هبروا "

 دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

****

" المجد للى عبروا و العار على اللى هبروا "

اللى عبروا 

من ولاد الشعب

غير اللى هبروا 

من ولاد الكامب

فارق كبير 

بين ولاد الشعب

الطيبين العاشفين 

الصابرين الصامدين

 و بين ولاد الكامب 

البياعين النهابين 

 اللى عبروا فى رباط 

حتى اخر يوم ف ايام السنين

و اللى هبروا 

ملعونين دنيا و دين

مهما باعوا 

ومهما حكموا 

مهما مصوا الدم

و تاجروا بالوطن

مهما دسوا السم

وداسوا ع البدن

اللى عبروا منصورين

و اللى هبروا مهزومين

اللى عبروا معروفين

و اللى هبروا مفضوحين

 مسحراتى الوطن 

و الحلم و الموال

يا اه

يا عين

يا ليل

 اللى عبروا بيصونوكى

و اللى هبروا بيبيعوكى

اصحى و فوقى و انطقى

قبل الوحوش ما يمملكوكى

و لعدوك يرهنوكى

و يسلموكى

قومى حى الكفاح

قومى حى على الفلاح

قبل ما تزيد الجراح

يا ندا الفجر وادانه

الندى يروى عيدانه

و النهار جى ف أوانه  

 مسحراتى و انادى

يا ولادى يا احفادى

رمضان كريم

شهر و عظيم

فيه العظات و المعجزات 

و الإنتصار

الفجر لازم يولد نهار

و الصبح مولود من نور و نار

مسحراتى و ف انتظار

الأمة ترفع راية إنتصار

رمضان كريم

يا نايم إصحى

وحد الرزاق