إلى روح القاضى المناضل النبيل هشام البسطويسى 

" واحد فى الجنة و اتنين فى النار "

مسحراتى

بصرخ ليلاتى

على طبلة صوتها

آنين ناياتى

أصحوا و فوقوا

لكل آتى

أوجاعنا جارحة

و دموعنا سارحة

أوضاعنا شارحة

من غير ما هاتى

القاضى العادل

يحكم بضميره

و القاضى الظالم

يحكم بأوامر غيره

واحد ف الجنة

و اتنين فى النار

واحد ظل الله ف الارض

و اتنين شياطين أشرار

العدل أساس الدنيا

و الظلم قانون الغابة

شرع وحوش وديابة

مش بنى ادمين

تجار اوطان او تجار دين

القاضى العادل 

بيجسد اسمى معانى الدنيا

و اسمى معانى الدين

ينشر ضى فى عتمة ليل

و يهد السور العالى 

بين الحق و بين اصحابه

يفتح شبابيكه و ابوابه

يدخل فى قلوبنا الضى 

ينور سكة لبكرة الجى

العدل اساس الملك

و الحلم الحى

القاضى العادل

يحكم بضميره

و القاضى الظالم

يحكم بأوامر غيره

و حكمه تحت الطلب

مسحراتى الغضب

و الاحتجاج

و الشوق

الجدر مادد لفوق

والصوت يشق الحلوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا عين 

يا ليل

يا آه

العدل تاه

و الظلم معموله انتباه

يا غرقانيين فى الزحمة

مستنيين طوق النجاه

انتوا الامل و الحلم

انتوا الميزان و الاتجاه

انتوا الشقى و ضناه

يا الف حسرة و اه

لما نلاقى العدل تاه

و الظلم معموله انتباه

و مهما زاد العناد

ومهما طال البعاد

صوت الجموع

له آوان ومعاد

مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق