بالامس كنت بزور عبدالرحمن ابني في سجن المنيا شديد الحراسة،  أول مرة اشوف عبدالرحمن بالشكل ده شكله تعبان جدا وزعلان ومتغير عن كل زيارة... عرفت منه انه تعرض للضرب و التعذيب والاعتداء الجنسي من مجرمين  في صورة بشر 

وده جزء من نص الرسالة التي كتبها وأعطاها لي :

"امي ترددت كثيرا عشان اكتب لك الكلام ده لأنه أشد ما حصل معي في السجون حصل يوم  06/04/2021 ...لأنه ليس تعذيبا فقط ولكن تعذيب واعتداء جنسي مخليني مش طايق نفسي... أنا احتسبتها عند الله،  يا أمي تعالي ضروري يا امي لان ممكن تكون اخر مره تشوفيني فيها لأني هعمل إضراب عن الأكل وعن الماء،   واعملي يا امي كل اللي تقدري عليه في الأمر ده.. اعملي بلاغات للنائب العام وحقوق الإنسان في كل مكان ..وارفعي قضية في الأمم المتحدة خلي عمر يعملها بالله عليكِ.. وأنا هعمل اضراب عن الطعام  حتي الموت  لأني نويت أطبق حديث رسول الله صلى الله عليه وسلم: "من مات دون عرضه فهو شهيد".

 زي ما قلت لك انا ترددت اني اقول لك الكلام ده عشان ما تزعليش لكن معلش الامر صعب جدا وكان لازم اقول لك يا امي.... التفاصيل يا امي كثير عايزك تيجي عشان اقول لك كل حاجه لان كل اللي حصل معايا دا بسبب اني بقول احاديث النبي كل يوم حديث بدون شرح من على النظاره عشان أعرّف الناس الجنائي  اللي في الغرف الثانيه احاديث النبي... بسبب الاحاديث دي في شخص(مسير العنبر) بيكون جنائي مسجون ومنصب( مسير العنبر )ده أعلى من المخبرين المباحث نفسهم هو بيتعامل مع رئيس المباحث وبيمشي كلامه على المخبرين كلهم وبيشغل معه مسيرين جنائي كثير بيفتحوا الباب والزبالة والتعيين وغيره.

 المسير الجنائي زعلان من الاحاديث اللي بقولها ومن حوالي شهرين وداني التأديب والمرة دي حصلت مشكلة في الامانات (الفلوس) واشتكيت للمسير إن  شخص ما وقّع باسمي و استلم الامانات مكاني وانا هعمل قضيه تزوير في اوراق رسمية وسرقة امانات عشان يحل المشكلة ويشوف مين اللي عمل كدا ...و فضل الكلام دا اكثر من شهر بطالب بحل المشكله دي.

 وفي آخر مره حصل مشادة كلامية بسبب المماطلة وقالي انا هعرفك تعلي صوتك ازاي ورح جاب المخبرين و عساكر القوة الضاربة كتفوني وغموا عيني وقطعوا هدومي،، خلعوني الهدوم بالكامل فظهرت العورة وكنت أصرخ  وأستغيث وأقول لهم استروا العورة، أستحلفكم بالله استروا عورة مسلم ...فتم الاعتداء على الشرف ، وبعد ذلك فتحوا عيني عشان يذلوني ويخلوني أسجد تحت رجل المسير الجنائي.. وفعلا عملوا كده بالقوه وانا متكلبش من ايدي ورجلي .

 لما قلت للمخبرين أنتم بتعملوا كده بسبب مسجون جنائي زعلان عشان أحاديث النبي مش عايز يسمعها؟!!! وهم مستمرين في تعذيبي ، وأنا بقول لهم في يوم القيامة في حساب عند ربنا اعملوا لليوم ده، فتغاظوا أكثر ،ثم اعتدوا على الشرف بالقوة حطوا دماغي تحت رجلين المسير الجنائي وهو قاعد ،،الحمد لله و حسبي الله ونعم الوكيل والله اكبر وهو العليم.

 سامحيني يا أمي إني عرفتك

وقد شارك في هذه الجريمة الشنعاء كل من:

1) ضابط سجن المنيا: محمد محمدين

2) بلوك أمين سجن المنيا: عمران

3) مخبر: حسين 

4) مخبر: أشرف

5) المسيَّر الجنائي: علاء ناجي ( أبوماندو)

6) عساكر من القوة الضاربة بسجن المنيا

وقد تقدمتُ بعد الزيارة   -بالأمس - بشكوى شفهية لكل من : الضابط المتواجد أثناء الزيارة ،  ومأمور السجن، ثم انتقلت إلى مقر نيابة المنيا وتقدمتُ بشكوى كتابية تضمنت واقعة الاعتداء البدني والجنسي ومرفق بها الأسماء.

.