القهوجي 

مسحراتي يا اهل الرجا 

وصـوتي قهوه محوّجه 

باقول يا ناري 

غُلُـب حمـاري 

بطلت كار العربجه

وقلــت لــولا 

حبايبي أوْلَى 

ما كنتش اهوى القهوجه 

أجـري عــلاوله 

شيشه وطاوله 

أحلى التماسي 

يـا ابــو النجــا 

شيشه وطاوله 

طاوله وشيشه 

والشمس طالّه 

لابسالي بيشه 

والنار فى قلبي مِوَهْوِجَه 

ـ تلاته سحلب وكركديه 

ـ حجر يا سكر 

ـ عيني يـا بيـه 

رجليّـا كلّــت 

لكن ما ملِّت القهوجه 

بين الحبايب 

قلبك يا سكر 

سكر ودايـب 

للــي يقلّـــب 

من غير ألاطه ولاَ لَهْوَجه 

ـ تشيـلك  عينيـنا يـا بلـدينـا 

"جال: لَعْ كفايه نروِّح بجَى" 

يقول لي سحلب 

أجيب له سحلب 

يقول لي قهوه محوّجه 

أجيب له قهوه 

يقــول كـازوزه متلـجه 

رصيت كراسـي 

علي النــواصـي

واقول يا ناسي 

ما اقدرش أنسى ولاَ أوِنّ 

كل الزبـاين قاعـده تِــزِنّ 

اللــي بجاكته واللــي بلاسـه 

واللي ينادي شَخْط وغلاسه 

وطفّه رايحه 

وطفّـه جيــه 

كُتْـر الزبـاين 

زَغْوِل عينيـا 

اللي يسهِّـم.. واللــي يألِّس 

واللي يزوغ علشان مفلّس 

واللي بلطافـه وذوق نـادانـي 

أجيب له قلبي على الصواني

بالطبله دقه      وبقلبى دقه 

ياللي سامعني ما تقولش لأ 

بيــن الحبــايـب لمّــــا اروْح واجــــــي 

قـــال الحمـــام: سيبتنـــــي أبـــراجـي 

بـاعــدِل مــزاج النـاس وانــا مشغــول 

مين غيرك انتى يا مصر يعدِل مزاجي 

اصحى يا نايم 

رمضان كريــم 

.