ياعلي يازيبق ..أنت فين ياعلي 

الحكاية هي هي

الحكاية مستمرة من زمان لزمان

من مكان لمكان..اي عصر او اوان

اي عصر او اوان اتوجد فيه ظلم او ظغيان 

اي وقت او مكان ..اتوجد فيه فساد و استبداد

و في كل لحظه تسكت الناس و الشعوب

ويحني الفقر و الحاجة و الذل رقاب العباد 

و تمشي الناس في الشوارع و الحارات ساكته صامته

تايهة و غرقانه في همومها..

من الضريبه و الجبايه ..من الفساد و المهانه 

تنتظر ناسنا المخلص و تدور عن فتي. و تنادي عليه 

فيظهر و بيان عليه الامان  

و المره دي يظهر الزيبق ..ويختفي

يطلع بكرامات و حكايات .. يلاعب الفساد و المستبد 

يلاعب المرتشي و الي يخون مهنته 

يظهر علي الزئبق و يختفي .. 

و يدور في الشوارع لسان الناس  الحكوتي..

يحكي للناس كراماته 

شعبنا دائما بيفرح بالبطل الشعبي و بيحكي حكاياته 

 حكاية الليلة عن مسلسل عمنا يسري الجندي علي الزيبق 

الزيبق ظهر في مصر في عهد العثمانيين وظهرنا لنا علي الشاشه في عهد مبارك 

افتكر سنه 87

هل كان الوقت يستدعي علي الزئبق ولا عمنا يسري الجندي كان شايف اننا محتاجين مخلص من الضرايب اللي بتزيد 

لدرجة ان الناس اطلقت اسم وزير الجباية علي وزراء المالية في الزمن ده 

تكتر المظالم تكتر المفاسد  

يكتر الاستغلال والمؤامرات 

الناس تنكمش اكتر  وتتوه في احوالها ويظهر العفريت 

علي الزيبق ابن حسن راس الغول الفارس المقدام اللي كان بطل وكان شريف 

كان حسن بيساعد كل ضعيف ولانه كان صاحب صاحبه وصاحب قيمة وصاحب مبدا 

في زمن غابت القيمة والمبدأ قتله سنقر الكلبي 

وعشان كده قررت فاطمه انها تبعد ابنها علي عن الصراعات وتختفي تربي ابنها بعيد عن العسس وسنقر 

يكبر الزيبق ويتعلم الاعيب الشطار والعيارين 

تسألوني مين العيار والشطار اقول لكم 

روحتوا موالد اه موالد 

مولد الحسين 

مولد السيدة او الرفاعي 

مولد سيدي ابراهيم الدسوقي او مولد سيدي احمد البدوي 

سامع سامع 

ولادنا جيل الانترنت والفيس بوك وتويتر بيقولوا ايه الموالد دي ومع كده شليف شباب منكم طبعا بيقولوا اه نعرفها 

طيب شوفتوا الناس اللي بيلعبوا لعب وحيل في الشوادر في المولد 

ايوه

انا شجيع السيما 

ابو شنب بريمه 

حالا بالا ساصارع اسد انما اية 

متوحش وها اخلي وشه شوارع 

تصقيفة يا ناس ما يصحش 

اهم دول بقي الشطار والعيارين اللي بيلعبوا بالعصي وبيحطبوا 

راح علي يتعلم فنون العيار والشطار 

علي بيكره الظلم وراثة عن والده الفارس الشجاع حسن راس الغول 

اتعلم فنون عشان يقاوم بيها الظلم واتعلم فنون التخفي والتنكر   

بدا على الزيبق مهمته يقاوم الظلم يهين الفاسدين ويحارب المستبد وفي كل ليلة يعمل حكاية مع واحد منهم 

مره قاضي القضاه حلاوة.. وحلاوة كان محفظ القرآن في الحارة وهو شخص امتهن هذه المهنة دون أن يكون جدير بها.. لكن ينقر الكلبي ليهين القضاء عينه في منصب قاضي القضاه ليكون لعبه في يده

قاضي القضاة  ما يعرفش يحكم غير باللي بيقول له عليه سنقر  الكلبي وبدل ما يبقى لسان العدل بقى لسان قائد الدرك العسس يعني

على الزيبق حرق دقن حلاوة القاضي وهو في الحمام عشان الناس تسخر منه لان الدقن هي رمز لمكانته

تحولت الحكاية لغموه في الشارع يغنيها مغني الحارات حسونة النجار

حطة يا بطة يا فلفل شطة

دقن الفاضي كلتها القطة

القطة كلتها كلتها

من بعد ياعيني ما حرقتها

وفي كل ليلة ومع كل حيلة يقرب على الزيبق من هدفه الكبير.. الكلبي سنقر

ايه اللي بينك وبين الكلبي يا علي.. ما يعرفش غير ظلم الكلبي وطغيانه

ليه حطيت الكلبي في دماغك يا علي.. مفيش احابة غير محاربة الظلم

على ما بعرفش التاريخ.. التار البايت.. لكنه حتى الآن من غير إجابة غير انه رمز الظلم اللي بيكوي الناس بالضرايب و الجبلية مرة بأيد القاضي حلاوة ومره بأيد شاهبندر التجار.. وعلى خلاص أهان الجميع

بقى لكل واحد فيهم حكايته مع الناس حكاية مهينة بغنيها حسونة لسان حال الناس الشعبي

والناس في كل الحارات تحكي عن الإهانات وتقل مكانة الكبار بينهم

وعلى يقول لهم ان الي بيخافوا منهم وعاملين لهم الف حساب جبناء ويحميهم عسكري جبان حيلان مهزوم

او عشان يهين العسس يقلعهم هدومهم في الشارع فيمشوا عرايا  و يدخلوا الدرك عرايا.. ويصبح العسس حكاية زي حكايات التجار والقاضي ورجال الوالي

وقصر السلطان عالي البنيان

بحجر فضة وحجر صوان

و اراضي تساع مليون فدان

قصر الوالي طبعا هالي

مليان صهللة والكون خالي

ودهب وفروز

وياقوت في ياقوت

ان عازت يده السرقة تجوز

امال ازاي يبقى الوالي

على بيقرب من سنقر اكتر والناس في الشارع والحضارة كل يوم بتنتظر مقلب جديد من. مقالب الزيبق اللي بيظهر بالليل يعمل عملته ويختفي والناس في البيوت

وبيوت الناس.. لا حيطان ولا ساس

ولا ليها لون ولا ليها اساس

وفي وسط الظلمة

تهل انت

ولا نعرف من فين أو أمتي

ترفع بنيان الغلبان وتطاطي بنيان الوالي

وترقص قصر السلطان

على الزيبق بيوصل للراس الكبيرة او اللي الناس متخيلة انها كبيرة

يدخل على متخفي ويعمل عملته مع الكلبي في الحمام

وفي الحمام في الحمام

على اللي جري لي في الحمام

يخرج الكلبي من الحمام عريان جسمه كله بيخر دم ري الدم اللي بشربه من الغلابة ويصبح غنوة في الشارع

الله على لمتنا زمان واحنا بنتفرج على مسلسل الزيبق في رمضان وحكاياتنا وليالي السمر في أحضان الأوطان َالاهل والخلان واحنا بتابع مسلسل على الزيبق مسلسل المخرجة علوية زكي وعلوية زكي واحدة. من رائدات الاخراج التليفزيوني.. وقدمت أعمال كثيرة وفي السكة دي قدمت كمان مارد الجيل بطولة نور الشريف وهي حكاية ها نحكيها في حلقة تانية

كنا ننتظر المسلسل ونحكي عن اللي بيحصل وننتظر حلقة بكره كأننا جزء من حرافيش المسلسل َاهل الحارة ونستني على الزيبق عشان نعرف ها يعمل ايه الحلقة الجديدة.. ايام كان ليها طعم في مصر المحروسة واللي غايبه عن أهلها وأهلها كمان غايبين عنها

المصريين كالعادة بيبصوا لعلي الزيبق او أدهم الشرقاوي او احمد أين شبيب او همام الفرشوطي ايوه بطل الصعيد و ده كمان اتعمل مسلسل رمضاني ها نبقى نفصل له حلقه خاصة بيه.. المصريين بيبصوا للأبطال دي على أنهم حلم الخلاص من الطغاة واللي بياخد حقهم من المستبدين والظالمين.

اما الطرف التاني بيبص له على أنه عاق ومتمرد خارج عن القانون

اه القانون.. طبعا القانون بتاع الطغاة بيبص للثائر على أنه خاين متمرد عاق.. قانون الحاكم مش قانون الشعب قانون بيحمي المستبد ويحقق مصالحه و يزود ثرواتهم يحميهم بس مالوش علاقة بالناس ولا الشعب

تكير الحكاية  وتوصل للمقدم دليلة مقدم درك السلطنة في الاستانة شريكة الكلبي في كل مصايبة واللي بتخطط من خلف الخليفة لدخول المجوس مصر.. تصل دليلة مصر عشان تشوف المتمرد اللص اللي بيهدد الكلبي جاسوسها ورجلها في مصر.. عشان يدبروا طريقة للخلاص من الزيبق

على واحدة واحدة بيقرب من تار ابو المقدم حسن راس الغول مقدم درك مصر العادل اللي تخلصت منه دليه وسنقر الكلبي لانه كان بيحاول يعدل بين الناس.. سموه في واقعة خيانة كاملة

فاطمة ام علي حست ان على هو اللي بيعمل كل ده وخافت عليه.. بس الموضوع خرج من بين ايدين فاطمة ووصل للنهاية

نهاية  اي حل.. الفردي الا الجماعي

الخلاص مش فردي

على بحيلة من المقدم دليلة استخدمت فيها ابنتها اللي أحبت الزيبق للقبض عليه ويتحكم عليه طبعا بقانون سنقر وفي غياب والي مصر بالإعدام بعد ما اقنعوا الوالي انه مستهدف من على.. وعلى طاولة الإعدام تفوق الناس وتخلص على من الاه ام ويبدأ على يكون ناسه ويقدر يكتشف سر معبد المجوس و تكون الناس أداة على للوصول للوالي وكمان مقاومة وكشف الاعيب دليلة وسنقر اللي بيهربوا مع المجوس.. عشان يقول لنا يسري الجندي انهم مش ها يسيبونا ابدا

اذن الخلاص مش فردي

الناس النايمة مش ها يجي لها الحل بشخص واحد

مفيش واحد بيحارب نظام فاسد

مش ها نجيب لك الحرية على طبق ذهب

ولا ها نقدر.. مش ها تتحرك ها تفضل زي ما انت

على الزيبق مش محتاج تشجيع

على الزيبق محتاج مشاركة

ها يقع على وكل على زي أدهم وزي سعد اليتم وزي همام الفرشوطي وزي كل واحد حاول يعمل خلاص فردي

لان مفيش حد يقدر يحقق العدل والحرية والكرامة لوحده

محتاج ترفع معنوياتك تمام

لكن على الزيبق محتاج كل الناس تشاركه وتساندن وترسم معاه الأحلام

دي الحكاية حكاية كل واحد حاول يغير لوحده لكن مع الناس نقدر نحقق الأحلام.. عشان الناس تحقق أهدافها لازم تشارك اللي حكاية وما يسمعوش كلام الفاسدين لأنهم ها يشوه كل حاجة جميلة بكلام من عينة خاين وممول وهكذا

ومن حكاية لحكاية 

الفرجة مش كفاية

ومن حكاية لحكاية 

الغنوة مش كفاية

كتبها المحرر