يجري دياب ويبوس تراب الغيطان

يوسف شاهين كان فاهم التركيبة

الأرض مش تصوير مشهد لكام فنان

الأرض كانت مصر

في لحظة الطيبة

وردان تقوم الصبح مغسولة بنور الناس

متوضية بالفجر

متونسة بصوت الحصاد والفاس

تلمح عيون عب ناصر موج البشر ع الأرض

يفتح لقلبه وطن

مالهوش خطوط بالطول

ولا خطوط بالعرض

مالهوش مكان إلا في قلب الطين

محمي بحب الناس

زي الصلاة والفرض

بملامح الفلاح وبلمسة الكف اللي اتعطرت

بريحة الخبيزة

وردان دي بلد في الجيزة

وردان دي ضحكة ولد

لما في زمانه اتولد

نزل القمر م السما

واتعلق على الجميزة

يمكن كتير اتقابلنا 

بس اللقا كان بينا

يشبه طريق السفر

فيه الكلام مختصر

فيه السلام بالإيد

وأحيانا يكون بالنظر

دلوقتي 

بيني وبينك اربع حيطان وبيبان

وخمس تلاف سجان

ووطن مابقوش بيجيبوا سيرته 

حتى في الجرنان

الأولة عب الناصر

تدور سواقي الأمل لاجل وطن متشقشق

والتانية عب الناصر

الحلم شيء محتمل ممكن في يوم يتحقق

والتالتة عب الناصر

رمضان كريم من يومه يجمع ولا يفرق

عشر ليالي

من بعد جمعة

رمضان بطبعه

يجري بسرعة

شايل فانوسي

ازاز بشمعة

شايل صحابي

جوه ضلوعي

نزلت دموعي

دمعة بدمعة

م الست زاهية 

لابو الحديد

من كفر ناهيا

خط الصعيد

لولاد سلامة

وللمناشي

بادق طبلي

وانا ليها ماشي

انده لفجري

فجري ماجاشي

انده اداني

يقولي اصبر

الله محبة

الله اكبر

يا حيطان مرابعة

حابسانا فيهم

دمي في رابعة

دمي في ايديهم

والاخرة جامعة

كل الخصوم

يارب عدلك 

ع الناس يقوم

عشر ليالي

صلاة وصوم

عشر ليالي

باكتب قصايد

عشر ليالي

بصوابعي قايد

عشر ليالي

بالفرح باحلم

يارب ما انت

بقلوبنا اعلم

من قدك انت

ع الخلق أرحم

رمضان كريم

بس انت اكرم