أبتليت الشخصية المصرية بكمية رهيبة من الخزعبلات والتوهمات السياسية والاجتماعية الغير مسبوقة علي مستوي الشخصية الانسانية ... المصري منذ ان يبصر الضوء وهو متيقن تمام اليقين بأن النور اذا قطع عالطول تظهر كل عفاريت الدنيا وان بير السلم ومنور العمارة هو وكر لكل الشياطين ... يكبر شوية ويدخل المدرسة فتهدده المس بأن لم يتوقف عن الشقاوة والغباء فمكانه أوضة الفيران وياسلام علي أوضة الفيران فقد كان قلبي ينخلع اذا مررت من امام بابها ...القطط خاينة والكلاب وفية بس غير طاهرة وانك لو كنت علي وضوء ولمسك كلب فلابد ان تتطهر بالتراب سبعة مرات ولايقبل لك صلاة اربعين يوم ... القطط الخاينة اكثر وفاءً من القطط البشرية التي تخربش روحك وتغرز اظاهرها في قلبك وكبيرها كلمتين .... سوري يابيبي اصل هو جاهز وبابا وافق عليه ... اما بخصوص الكلاب الغير طاهرة والله اري في المشهد الاعلامي والسياسي أناس الكلاب أكثر طهارة منهم بملايين المرات ... السيدة او الفتاة الاندبنتت مسترجلة ولاتحب الرجالة .... طب هو فين الرجالة ماهي لو انت راجل ودكر وبني أدم بجد هتلاقي الاندبنتت ديه بقت اتنين ليمون و شمسية وتحولت لأمينة .... كلهن أمينة ولكن فين سي السيد ...

سياسياً ...

لا انسي ابداً مشهد شكري سرحان وحسين رياض في رد قلبي وهم يهتفون يسقط الطاغية .... يسقط الطاغية هههههههههه الملك فاروق الطرطور المحتار بين امه والنحاس باشا والمعتمد البريطاني تنعتوه بالطاغية ... بأمارة أيه ...هه بأمارة أيه ... ده بطيخة .... ده المرة الوحيدة اللي شرب فيها بريل وقرر يبقي راجل المعتمد البريطاني راح له القصر وفرض عليه النحاس باشا رئيس وزراا في حادثة 4 فبراير الشهيرة ... والالذ والاعظم تلك المفاجئة نقدمها للناس بتوع يسقط الطاغية وهي ان تنظيم الضباط الاحرار تأسس للثأر من المعتمد البريطاني والنحاس باشا بسبب اهانتهم للمليك المحبوب المفدي في 4 فبراير وده كله في مذكرات الضباط الاحرار ....

عبد الناصر متجهم ومكشر دائما وغير عاطتفشي ... ارجعوا لخطابات الريس قبل 67 وشوفوا كمية الضحك والبشاشة .... وازاي غير عاطتشفي وغير انساني وهو من فرط تقديره واحترامه للصداقة ترك حكيم يخسرنا الوحدة مع سوريا و الهزيمة في النكسة وصبر علي صديقه حتي النهاية في أحضان برلنتي ... انساني وعاطتشفي ولا لأ ....يابتوع العواطف ..،..

الرئيس المؤمن محمد أنور السادات هههههههه بأمارة ايه ... مؤمن ازاي لامؤاخذة يعني ... مؤمن من انهي حتة بالظبط ... ده كان سكرجي وبتاع نسوان وحشاش يعني كومبو 3 في 1 وجاي تقول لي مؤمن ...

الرئيس مبارك حكيم الأمة ... نعم .... نعم .... من أمتي كانت النطاعة هي أساس الحكمة ... ده راجل لو وزعت نطاعته علي البلد سيتبق عنده فائض يوزعه علي الدول المجاورة ... مبارك حرامي الامة وليس حكيم الأمة ...

المشير طنطاوي حمي ثورة يناير ...

ههههههههه بجد مش هعلق لان تلك الجزئية في التاريخ ستكتبها انشراح شخصيا مع وصلة من العزف المنفرد تنهيها بكلمة آحاااااااا

الرئيس مرسي اول رئيس مدني منتخب ...

لأ هو مش أول رئيس منتخب هو اول رئيس لم يكن يعرف انه سينقلب عليه الا بعد ماقال له سيسكو ... معهلش انت كده مقبوض عليك ااافندم ... درفينج دونت مكس والواد عاشور قبض العشين جنيه ونزل سكينة الكهرباا اااريس ... وانت نايم في العسل اااريس

تعالي لي برااا كده في الوسع عشان احنا داخلين علي منعطف تاريخي ... طبيب الفلاسفة ... الزغلول الكبير المسهوك الاول في بر المحروسة بيقول ايه .. السيسي بيقول هو واتباعه ومنافقيه انه لولاهم لما حدثت الموجة الثانية من يناير في ٣٠ يونيو وانه هو بطل ثورة ٣٠ يونيو ... ليه هو انت اعطيت اوامر للجيش بالنزول واحنا تابعناه ولا الشعب هو اول من نزل وانتم لحقتم بنا ... نحن من نزلنا في البداية ونحن من ناضلنا ولولا نزولنا لكان مصير السيسي هو مصير كوسا تركيا ....

غداً لن نكتب عن تلك الترهات وسنكتب عن ابطالنا الحقيقيين ... سنكتب عن أبراهيم الرفاعي وعبد المنعم رياض واحمد حمدي وعبد المنعم واصل وعن عبد العاطي صائد الدبابات وعن الحسيني أبو ضيف وجيكا وسيد رزة وخالد سعيد و محمد الجندي ومحمد بائع البطاطا وشهداء يناير وكل الابطال الحقيقين ... مش الابطال الكرتون ! !