تكبير الخط تصغير الخط

انا مواطنة مصرية ساكنة فى الماظة مصر الجديدة زوجى بيشتغل فى شركة خاصة وبندفع الضرائب المقررة على الدخل, بدفع ضرايب على كل سلعة بشتريها, بدفع ترخيص العربية مبلغ وقدره ورغم كده لما بركن فى اى مكان فى بلدى بدفع فلوس او الونش يطاردنى, بدفع كهرباء ومية وغاز وغيره, ابنى بيتعلم فى مدرسة خاصة قريبة من بيتى, لما حد بيتعب بتعالج انا واهلى فى مستشفيات خاصة من الاخر انا اللى بدفع للدولة  ومش باخد منها اى حاجة وعايشة ومتعايشة الحمد لله

وفى يوم لقينا لجنة جاية من المحافظة والحى بيقولوا الشارع بتاعكم اللى هو اصلا عرضه 18 متر محتاجين نشيل عماراتكم (اللى مسجلة ومن شركة مصر الجديدة للاسكان والتعمير اللى هى لا مخالفة ولا عشوائية ) عشان نوسع الطريق !!!! طب ازاى !!! 

اصل الدولة عملت قانون "نزع الملكية" المكان اللى يعجبها تاخده (ايوه زي ما بقول كده) تحت شعار المصلحة العامة والنفع العام !!!

طب احنا نروح فين ! اضمن منين لو رحت مكان تانى ميجيش عليه الدور تحت شعار المصلحة العامة !

احنا مش هنسيب حقنا وهنجيبه بالقانون لاننا اصحاب حق وربنا اكيد معانا وهو اعظم من الكل, بس احب اقول دى البداية واللى هيقول الموضوع بعيد عنى وميخصنيش خلى بالك محدش ضامن حاجة بعد قانون نزع الملكية 

اه نسيت اقول فى مقابلة معالى نائب المحافظ ومعالى رئيس الحى (زي ما بيقولولهم) قالوا هيودونا مكان كده اسمه اهالينا 3 او هيراضونا (كتر الف خيرهم الصراحة ضيعوا وقتهم الصراحة ) وكانهم بيتفضلوا علينا اسيب شقتى فى قلب مصر الجديدة عشان يودينى اماكن متطرفة 

صباح الخير يا بلد الامن والامان