عبد الناصر ملعون...ما لا تعرفه عن الديكتاتور..من فضلك أضف الشتيمة المناسبة لهذا الرجل في تعليقك على المقال يمكنك أن تعتبر هذا المقال  أيضًا إدانة لعبد الناصر ..

لستُ من المهاوييس بأي رئيس أو حاكم ومش من المسبِّحين بحمد كل من يحتل كرسي السلطة وأرى أنه لا يوجد رئيس يستحق حكم مصر حتى اليوم ... بس هى الناس اللي بتهرب من أزماتها الحالية وملهاش شغلانه غير سب وشتم عبد الناصر ليل نهار وفي أي مناسبة وبدون مناسبة وفي أي كتاب أو جورنال أو برامج تليفزيون أو صفحة إنترنت أو في قعدة مع سيجار كوبي وكاسين ويسكي مثلا مش ملاحظين إن عبد الناصر مات من 50 سنة بحالهم ... 50 سنة ... يعني حتى لو افترضنا صحة كلامهم إن عبد الناصر هو اللي خرب مصر أول ما حكمها وحولها من المستوى الياباني أو السويسري اللي كانت عليه إلى بلد متخلف مفيهوش مصانع ولا زراعة ولا كهرباء ولا تعليم ولا مدارس ولا جامعات ولا جيش ... 

عندك يا سيدي 50 سنة كاملين بعده فماذا فعل الذين جاءوا بعده واكتشفوا حجم الخراب .. لماذا لم يحولوا مصر لديمقراطية حقيقة وبلد فيها حريات وتداول للسلطة ولماذا لم يصلحوا مصر طوال 50 سنة .. حتقولي عبد الناصر هوه اللي وضع البذرة لكل اللي جاءوا بعده وأسس نظام الحكم العسكري حقولك أغلب دول أوربا في الأربعينات والخمسينات والستينات كان بيحكمها جنرالات وكل ده اتغير بعدها بسنوات (وإلا بقى نقعد نشتم سنويًا في رمسيس التاني لأنه أسس لحكم الفرعون الفرد الطاغية الإله اللي استمر لحد اليوم أو نعمل عيد سنوي لشتيمة محمد على الجندي الألباني اللي أسس لحكم الفرد الطاغية المستبد في مصر مثلا)

 حتقولي عبد الناصر هوه اللي رسم الطريق برضه حقولك إن كل اللي جاءوا بعده لم يسيروا حتى على طريقه ولم يتبعوا منهجه كنا قلنا ماشيين على نهج الخراب بتاعه ... يعني كان عندك بعد ناصر عصر الانفتاح الساداتي وكامب ديفيد والسلام مع إسرائيل والعزلة العربية وطرد الخبراء الروس من مصر والارتماء في أحضان أمريكا ومحاباة الإخوان والتحالف معاهم والقضاء على الاشتراكية وارتداء عباءة الوهابية ... يعني دي سكة غير سكة ناصر خالص ... طيب ليه مصر ما اتقدمتش برضه واجتازت الخراب بتاع ناصر ما دام مشيت في طريق تاني  

 أقولك بلاش دي كمان !!! عندك يا سيدي من بداية سنة 1981مع عهد مبارك ومصر دخلت عهد الرأسمالية بقوة وسيطرة رجال الأعمال على السلطة والثروة واستمرار التحالف مع الصهاينة والأمريكان وخصخصة المصانع والبنوك وبيع الشركات الرابحة والخاسرة وتبوير الأرض الزراعية وطرد الفلاحين منها وإهمال التعليم والصناعة وبيع الأصول والآثار والغاز والبترول والذهب بثمن بخس وتهريب الأموال والمليارات للخارج وتزاوج رأس المال مع السلطة ودي سكة تالتة غير سكة ناصر ( صاحب الخراب ) طيب ليه مصر ما تقدمتش برضه ... ليه !!!

مع العلم بإن تجربة ناصر انتهت وماتت وشبعت موت !!! بلاش دي برضه ... آلاف الأقلام ترى أن أزماتنا المستمرة حتى اليوم بسبب نكسة 67 حتى بعض محترفي السياسة وبعض الهواة وبعض الذين جاءت بهم الصدفة يؤكدون ذلك وهم يتناسون أننا انتصرنا في 73 ومسحنا عار الهزيمة وأصبحت 67 مجرد ذكرى لأن الجولة الأخيرة انتصرنا فيها وما زلنا نحتفي كل عام بالنصر وبأسطورة تدمير بارليف وبعظمة البطولات في حرب 1973 وكسر غرور العدو لكنهم ـ ويا للعجب ـ يرجعون كل مشاكل مصر اليوم بسبب 67 ويقولك مصر اندبحت في 67 ومصر خربانه لحد دلوقت بسبب 67 وبذلك هم ينكرون أننا انتصرنا في 73 أو يعتبرونه انتصارًا زائفًا دعائيًا مُمسرحًا ما دام عار الهزيمة ما زال يلاحقنا حتى اليوم كما يرون ... لو لسه ناوي تقول لي إن ناصر هوه اللي زرع بذرة الخراب في مصر حقولك حتى لو ناصر عمل كده وخرب مصر وخلاها على التراب تماما ودفنها تحت الأنقاض بكل ما فيها من حياة ومن بشر عندك اليابان يا سيدي انضربت بقنابل ذرية وقامت من تحت الرماد في فترة أقل من 20 سنة وألمانيا خرجت من الحرب مقسومة دولتين وأصبحت دولة عظمى صناعية وقوية في فترة أقل من 50 سنة وفرنسا تم احتلالها وتحررت وبنت دولة قوية في أقل من 50 سنة ... وماليزيا وسنغافورة بدأوا من الصفر وأصبحوا من النمور الآسيوية

 دا حتى رواندا الأفريقية يا مؤمن اللي راح منها مليون قتيل في حرب أهلية قاسية أصبحت اليوم أقوى اقتصاد في قارة أفريقيا كلها ... الحقيقة إن العيب مش في عبد الناصر وإنه مش سبب الخراب ولا حاجه ... سبب الخراب إن مصر لسه غارقة في الأفكار دي ولسه بتتخانق من 50 سنة لحد النهاردة ولسه بتعيد إنتاج الجدل والفشل ولسه ملهاش كيان قوي يفرض نفسه بين العالم ... 50 سنة كفيلة ببناء 3 دول كاملة من الصفر ... دول لم تعرف ناصر ولا غير ناصر ولم يكن بها سوى الرمال والجمال فأصبحت في مصاف العظماء الكبار وتم تصنيفها في مقدمة العالم من حيث الرقي والنظافة والتكنولوجيا والتعليم والاستثمار والسياحة ... فات 50 سنة ففقدت مصر حتى ما كانت تكتسبه في عهد ناصر فازدادت فقرًا وجوعًا وجهلاً ومرضًا وتطرفًا وإرهابًا وتراجعًا وإخفاقًا وتنازلًا ومهانة وحققت مراكز متأخرة في معظم المجالات وفقدت ريادتها في الفنون والآداب وراحت تقترض وتتسول وتتنازل عن أرضها وثرواتها وآثارها وتنصاع للأوامر ... فات 50 سنة لكننا لحد دلوقت لسه الملف بتاع ناصر ده بيتم ترويجه واستخدامه من وقت للتاني وفي كل المواسم ربما لإيصال فكرة مفادها إن مفيش حد أو أي حاكم كان بينحاز للفقراء ولا حقق لهم عدالة اجتماعية ولا حاجه ... وإن مينفعش الناس دلوقت تحن إلى رئيس كان عايش من 50 سنة لأن ده فيه إهانه لكل من جاءوا بعده الذين أهانوا الفقراء والعمال والفلاحين والموظفين وقاموا بتجويعهم وأهانوا مصر وباعوا أرضها وثرواتها ... وبالمرة للتشويش على الكوارث التي ما زالت تحدث حتى يومنا هذا ...

لو عاوز بقى تستمر في شتيمة عبد الناصر لحد سنة 3000 براحتك بس متنساش ساعتها تقولي ماذا فعلت في مصر في مدة الـ 1030سنة بعد وفاة ناصر