كنّا بنرسم شجرة وباب

أنا وأنتِ وكل الأحباب

وفرشنا رموشنا واحلامنا

سماعة دكتور فى وداننا

وعروسة وكحكة أعياد

صوت المدفع هد حياتنا

حادى بادى يا عم زبادى

شاشة بعرض الأرض بتدبح

وتقطع أوصال اولادى

بتشد عيونى عن وشى

وبتقتل أمى وجدودى

وبتحرق شجرى وزتونى

والرملة اللى بتحضن عشى

والهدمة اللى بتستر بدنى

وايديا اللى تمد الخضرة

شجرة تفرش صيفنا بضلة

شاشة بعرض القلب بتوصف

ازاى هدوا بيتنا ودارنا

والمدرسة والمشفى وجامع

وكنيسة وقبور الشهدا

ومحطة بتوّلد نور

ازاى مدوا الأرض البور

على وش الدنيا وفرشتنا

فى الحقلة وغيطان النور

ازاى مدّوا فى ارضنا سور

يمنع عنّا الهوا والشمس

واخواتنا فى الناحية الثانية

أسلاك شايكة كل حياتنا

ومعابر تصريح بمرور

شاشة بعرض القلب تصور

روحى طايرة ع اللى خالقها

هى وكل الأطفال

شهدا غصب عنهم

شهدا

بالأمر الصادر بالقتل

للشمس والفجر وباكر

والقمرة وكراريس بتذاكر

والأم الحامل والحاضن

وعروسة جميلة وولادة

والرضع وجدور الزرع

والطينة اللى بتحضن فرع

وشتانا اللى بيشتى دموع

وحاضرنا المربوط بتاريخنا

وتاريخنا المرفوع الراس

شاشة بعرض القلب ذليلة

والمدفع طالل ع التلة

يطحن عضمى ويا الغلة

والكون ساكت

ساكت خالص

بيعض ضوافره ويتظاهر

كلاشينكوفنا رصاصه الطاهر

" راح يزرع أرضنا بمقاومه "

والفجر ينور فى الضلمة

وش ولادنا

ونياب ومخالب للظلمة

لسّة بتقطر مننا دم