للشاعر الكبير فؤاد حداد

...................

أفضل أقف وادور

الثانية بتعدي فى حبل غريب

الشوك من الميه

قرش صاغ للرغيف

أحلامى لعيني

الجرس للإشارة

التلات ألوان

للمحطة الجاية

اسمك شجر فى الريح

لكلبش فى إيدى

القمر للزينه

الفجر للمصابيح

قاعدين يبصوا لبعض

كأنهم أعداء

ما كانش قلبي شهد

الليل مع الشهداء

جبيني الاخضر سجد

فى جبانات السجون

القافية ولدت منى

فين البنات

والبنون

الكلام بسيح

يا شيخه يا ام الآه يا أم البنات

ما تؤمريني أكون

مغنى كل البلد

معاي عبد الرحيم

معاي لما أعزى ، لسه ما قال ليش

الموت محايد

لما أبطل جرايد

لما أكلم نفسى

لما أصيف واشتى

قبل الهدوم

معاه لما أزوره

أقرب إلى الأرض منى

تحت الندى عصفوره

شهقت زي العيل

لما يقع ويقوم

يافطه فى عمر مكرم بتتقلقل

زي الشرف ما بيقتل

والحق بيبهدل

زي الصعيد لما اتوجد

معاي لما اعتقد

إن الزمن يعدل

أو ابن آدم

معاي لما تركته

لما لقيته

دلوقتى بس حننتبه لحركته

لهدوئه

يا مغربية عصر فى تيابه

كباري زرع بتتنبه لغيابه

مرايه

ملحمة من النيل

البنايين شبهه

وربطة المنديل _

وعقدة المنديل _

أنا عجوز جلده على إنساني

أحافظ عليه بظوافري وأسناني

أنا عجوز جلده على أحبابي

أحافظ عليهم بظوافرى ونيابي

نسوان ورجاله تشغي فى دمى يا ولدى

يا حته من كبدي

إيه اللى بيدوخك

الشوك من الميه

التذكرة فى الرغيف

وكل شئ انضحك

عليه بيضحك على

أحلامى باعت عيني

آهين يا عبد الرحيم

ما قلت لكش آهين

أحلامى باعت عيني

ولا عين بدال العين

فكرني إمتى وفين

كان البساط الأحمدي بيطير

أيام ويرجع

زي الحمام

على السطوح الأحمدي فى الإمام

إيه اللى اشجع

الضي ولا الظلام

من قبل ما نجاوب وماتجاوبى

يا شيخه يا ام الآه

ورد البلد صاحبي

غنوه فى درج الحياه

ظلها فى الأرض

زي الحلق فى الودان

سلطان على قلبي

وباب موارب

بيروح وبيجى

بيقول وبيخبى

ورد البلد صاحبي

على ريحته ميه وشوك

أعيش واموت واحبى

ما يبص ليش من فوق

ويلف زي الطوق

ويتنقل جنبي

ويخش للتنين

بالسيف وبالتهنين

ويقول يا مصريين

إمشوا على دربي

ويا كلمتين تانيين

يا الاستغمايه

يا مفضفضه معاي

يا سطر من واجبى

يا بنت عم النور

تعالى لما تزور

عبد الرحيم منصور

الشاعر الشعبي

هو اللى مد وقال

فى ميتم الموال

هون عليك يا خال

ورد البلد صاحبي

أفضل أموت واحبى

* *

يا ليل ينوبك ثواب وصلني للعتبه

مشيت كأنى غريق الأرض للرقبه

أتلقف الترمايات

واسقط التكنولوجيا فى امتحان النايات

لو تقبلوني صبى يا عرضحالجيه

اكتب لكم مغربي حجاب وتزكيه

وارقى الغلابة عشان ما يبطلوش غلبه

* *

حفظنى دور الأوله بتحلم

والتانيه تترحم

والتالته جايه تقولي مين الأم

الضي ولا الظلام

على الربابه والكلام توأم

أبو زيد والادهم يا نعيمه حسن

للتاجر الشاطر يبيع العسل

ويشترى العلقم

عبد الرحيم ما راحش من بالى

الليل عتر فى الشمس قايمه لي

على حيلها لا بتعقد ولا بتمشي

والدمع ما بيسقطش من وشى

ولا خد ميزان الخير على غشى

ولا خداعى

ولا عاتبنى وقال مافيش داعى

والليل عتر فى الشمس بالصدفه

القاهره فى ديل المعزيين

يوم ما الحبايب يشبهوا المعازيم

وعساكر البلدية والتنظيم

بيشيلوا بالقفه

عيوني وعيونك يا عبد الرحيم

حفظنى دور الأوله بتحلم

فؤاد حداد