-
℃ 11 تركيا
-
22 فبراير 2025
قصيدة مسعود شومان : عارف يارب
قصيدة مسعود شومان : عارف يارب
-
6 مايو 2021, 10:35:52 م
-
1074
- تم نسخ عنوان المقال إلى الحافظة
أنا كنت بسقي الورد علشان بحبه
ومش طمعان في رتبة جنايني
""""""""""""""""""
عارف يا رب
دي كناسة الدكان
ودي الرفوف اللي عليها التراب
ودا غنايا للفضا
تحت السما خدت الغنا كاري
ومش باقي كلام في جيوبي
كل اللي عندي غنيته لناس زيِّى
رفعت إيدي وابتسمت
مستني حبة مطر تحن ع الصحرا
وعجله لابني الصغير
وبالطو يدفي جروحي م السقعه
واللي عشمني قوي
قلبي لما ابتدا يفهم عيون الناس
ويقدَّر النور اللي بينهم وبينك
نور ومطره بيتقابلوا في نص الليل
والمجروحين بيبلوا شفايفهم
وكنت فرحان بالحنان اللي كبر في الرمل
والورود اللي ابتدت من قلبها تفرح
وتقول صباح الخير يا عم الحاج
وكنت اسلِّم على كل حبه بس خايف
يا رب حوش عن الورد العيا والقطافين
واسعفني بالميه عشان أبل الورق
أنا بحب الورد وما حلمتش أبيعه
بحبه لوحده من غير حاجه
وبحبك
طب ليه خلقت الحنان والمنجل
أنا هنا في الطل باتحنجل
والسما تحتي وبتشهد على روحي
كلمتها مره عن نخله محرومه من الجمار
وعن ضلمه عشمانه في نهار
وعني
وأنا قاعد بنقي الورق
والشمس بتهف العفار
وعن إيديا وهي طايره في الهوا
وبتقلد جناح أبيض في لوحه رمادي
مستني حبة ورد أكلمهم
ويفرحوا بقلبي وتمليسة إيديا
وبالميه اللي جريت والغنا في موجها
أنا نفسي أسقي الورد بس
يا رب
بسقيه وأنا نشوان
عارف
أنا كنت بسقي الورد علشان بحبه
ومش طمعان في رتبة جنايني .








