رمضان كريم لمروة عرفة

ريحة نسيم البحر

سينما أمير والليل

زحام كأنه نهر

يشبه نزول السيل

يمكن عيوننا اتقابلوا

بالصدفة في المنشية

ويمكن كمان اتعاتبوا

أو ضحكوا بالنية

بس الأكيد اتصاحبوا

في سكة الأمنية

دلوقتي باكتبلك

من ابعد مكان في الأرض

من قلب حرب بتاكل

ضحك البشر والورد

مش قصدي ازيد وجعك

ولا ازيد في حيطانك

القصد م الأول

ان القصيدة

عشانك

الأولة مروة

طبطبتي ع المخاليق ياما بكتير فعلك

والتانية مروة

مهما الحيطان بتضيق لازم هتوسعلك

والتالتة مروة

ملعون أبو السجان اللي يزيد زعلك

في المكس واقف

كأنه عازف

ماسك في عوده

م الغنوة خايف

خايف يغني

يلقى التمني

بنوتة حلوة

واقفه قصاده

بتغني زيه

غنوة زوروني

لون المراكب

راكب في لوني

خايف اعاتب

تكتر سجوني

كان لي صاحب

صاحب عيوني

اخدوه المغارب

والفجر قارب

لا سمع أدانه

يومها بودانه

ولا شاف نهاره

من سور حيطانه

من الرمل ماشي

للميرغني

ومن الشقافة

للعطارين

في الفقر قلبك

كان غني

في السجن عينك

مش مسجونين

يا مروة صورتك

في ضحك بنتك

جايبين في سيرتك

كل يومين

من سيدي بشر

لسيدي جابر

خدني الكلام

مابقتش قادر

قادر يفك

الغيمة عنك

قادر يوسع

عليك سجنك

من قدك انت

ع الخلق أرحم

رمضان كريم

بس انت أكرم