(1)

كله تمام

مكتوب علينا .. الرضا والابتسام

كُبر الدماااااغ ...والانسجااااام 

يرتاح ضميرنا ف فرشتُه

وما نقلقوش .... خليييه يناااام

ساعة العمل والاجتهاد ....بيشدنا كلام مُعاد 

يهِدِّنا.. يِرُدِّنا.. للخلف .. ما نشوفش الأمام

وساعة ما تِبقى الكِلمة قوت

يا حياة ياموت... يِحلا السكوت

وتطل من بحر الدموع .. بسمة خضوع

حنشكى لييييييييه

كله تمام

(2)

(متحف)

حنطنا الضحكة فوق شفايفنا 

حنطنا (إزيَّك) ( عامل إييييه ؟)

حنطنا (صباح الخير) و(سلامو عليكو)

حنطنا الواد الشقى اللى بيتنطط فى الشارع

حنطنا الأوضة .. البيت ... الشارع 

لكن لسة الناس بيزوروا المتحف 

ما يزوروناش 

(3)

(صورة)

نِزلِت دموعها

 صرخْت وقلت معذورة

إزاى هتمشى

 ونَفس الرجل مكسورة؟!

إزاى هتمشى 

ونِفس التانية مكسورة؟!

إدُّوها حق البُكا 

ضحكالكو فى الصورة

(4)

(ابن البلد)

يا ابن البلد يا صاحبى 

سر ماهوش فى بير 

قلبك زى اللبن قلبك زى الحرير 

ده لعبة الصُّغَيَّر وعكاز الكبير

وساعات ألقاه بِيِجمد لو يغضب أو يِغير

جرس بيرن دايمًا وبيصحِّى الضمير