تكبير الخط تصغير الخط

ظهر اعلان مدينة نور فجأة لكل المصريين و عمرو اديب في زيارة لمقر تسويق مدينة نور ( اول مدينة رقمية خضراء بالعاصمة) و مقابلة مع هشام طلعت مصطفى و بالتعاون مع هيئة المجتمعات العمرانية  و تمويل من اكبر بنوك مصر و فجأة الخبر تصدر جميع القنوات التليفزيونية و جميع القنوات و الصحف المصرية و العربية و طبعا الشاهد ان مجموعة طلعت مصطفى و هشام طلعت مصطفى لما يحط اسمه و يطرح عن مشروع بالحجم ده و خاصة سابقة الرحاب و مدينتي اللي هما يعتبروا نواة اصلا كل شيء حصل و ظهور القاهرة الجديدة و العاصمة الادارية يبقا ده موضوع الموسم...طيب كل ده جميل و الاجمل و الرائع بقا ان هشام طلعت مصطفى قالك انه بيطرح لاول مرة مدينة لكل فئات المصريين لتجمع جميع الطبقات من اول المتواضع حتى الأثرياء و دليل الكلام انك بمقدم ٣٧،٩٠٠ جنيه و قسط شهري ٣،٧٩٠ جنيه فقط لمدة ١٥ سنة هيبقا ليك وحدة سكنية في اهم مشروع بالعاصمة الادارية...طبعا رقم تليفون مجموعة طلعت مصطفى من امبارح كان سبب ضغط جميع شبكات مصر و بما اني افهم شوية صغيرة على ادي في قراءة السوق العقاري كنت عارف ان الحداية مبترميش كتاكيت بس قولت انا هخوض التجربة و اجيب الزيتونة و بالفعل توجهت لمقر تسويق احد فروع مجموعة طلعت مصطفى و كنت موجود الساعة ١٢ يعني بعد معاد فتح الفرع بساعتين و نصف فقط و اخدت رقم حجز يا فندم رقم ١٥٠ و قدامي حوالي ٤ ساعات و طبعا بصيت في وشوش الناس عشان اشوف الشريحة المسكينة المقبلة اللي كان قوامها ٨٠% فاهمين و على ملامحهم الثراء و ٢٠% المساكين اللي صدقوا اللي جايين عشان يشتروا او يستثمروا في اهم مشؤوع و يقبوا بقا و يلحقوا الفرصة خاصة ان اللي هيحجز في اول اسبوع ليه خصم ٥% ( يا حلاوة يا ولاد) بص بقا يا سيدي....

هل اللي قالوا هشام طلعت بخصوص مقدم ٣٧،٩٠٠ و قسط ٣،٧٩٠ جنيه مش حقيقي...لا حقيقي بس مقالكش التحابيش بقا.....الوحدة دي هي عبارة عن استوديو مساحته ٦٧ متر غرفة نوم واحدة...الوحدة دي اجمالي سعرها بالتمام و الكمال من غير اشتراك النادي يا فندم ١،٦٧٧،١٦٧ جنيه.. لا استنى اكتبهولك عشان شكلك مش مصدقني ايوة مليون ستمائة و سبعة و سبعون الفا و مائة و ستة و سبعون جنيه مصري فقط لا غير....يعني حضرتك سعر المتر حوالي ٢٥ الف جنيه فقط....اكملك بس !!

هتقولي اومال فين اللي اتقال بالقسط الزهيد و المقدم البسيط هقولك انت يا مسكين هتدفع دفعة تعاقد ب ٣٧٠٠٠ و بعدها ب ٣ شهور دفعة تانية ب ٣٧٠٠٠ و بعدين تبدا اقساط اول سنة هتدفع فعلا ٣٧٩٠ جنيه و اخر السنة هتدفع دفعة سنوية ٣٧،٩٠٠ و بعدين نزود القسط كل سنة - يعني السنة الثانية القسط هيبقا ٤١٠٠ و دفعة سنوية اخر السنة ٤١،٠٠٠ و هكذا نزيد كل سنة لحد ١٥ سنة و بعدين هتدفع دفعة تأمين عند الاستلام مش عارف تقريبا ٥٠ الف في خمسين الف......طيب ايه الخلاصة ان حضرتك هتدفع ١،٦٧٧،٠٠٠  اللي هو الرقم اللي قولناه ابو مليون و ستمائة..الخ علشان تحصل على استوديو ٦٧ متر سعر المتر ب ٢٥ الف جنيه....طيب انت كدة وضعك ايه في المدينة انت باشا بس صغنن شوية لا صغنن كتير، لا انت مش ع الخريطة....بص يا سيدي الشقق اللي هي شقق بقا اقلها غرفتين مساحتها ٩٠ مثلا او ١٠٤ و بعدين شقق ال٣ غرف اللي هي ١٨٠ او ٢٠٠ او ٢٠٥

طيب هديك مثال شقة مساحتها ١٤٥ متر بنفس نظام السداد هتقف اجمال بالضبط ٤،٣٩٦،٠٠٠ خلاص بقا انت اتعودت متقلقش ايوة اربعة ملايين ثلاثمائة الف و ستة و تسعون الف جنيه مصري فقط يعني المتر ب ٢٩،٠٠٠ ايوة تسعة و عشرون الف جنيه مصري.