يلا نحكي في الفاضي.. نهاية ستينات القرن الماضي..

طلبه بجامعة اسيوط..نسكن في افقر احياء اسيوط..الحمرا او الوليديه..الغرفه ضمن شقة  بالميه والنور  ايجار الغرفه  في الشهر جنيه.. حسب ظروفك.. ظروفك حلوه وابوك عمده ولاشيخ غفر ..برطع لوحدك في الغرفه..ظروفك زفت..هاتلك جوز مقاطيع زيك ..وبارك الله ف حلة العدس ..كرتونة عيش القرقوش بتاع الوالده تحت السرير.. برطمان السمن الجاموس م البلد ..نكله فجل روس من شارع رياض.. سخان الكهربا ودمس فول او عدس...سرقه من ورا صاحب الملك والقرشانه مراته..

كل الطلبه..ف الشتا لابسين ..شيرز ازرق .. بلغة الايام دي بلوفر..مخروم عند الكوع..معني عدم وجود خرم عند الكوع..اما ان الوالد شغال حرامي في الجمعيه الزراعيه..او العيله عواد  باع ارضه ياولاد !!..يللا نوجز. .. نخش في الموضوع..وهو عن تمسح بعض  الحقراء بالسلطه والارتماء  تحت اقدامها..

المهم شقة  تلات غرف ..في حي الحمرا الشديد الفقر ..يسكنها تلاته..حضرتي طالب تجاره..طالب هندسه من شمال قنا..موظف من المنوفيه..خريج كليه حديث.. بالعلاقات العامه بالمحافظه  ..شغلانته ..يقص صفحة الوفيات والمناسبات الجتماعيه .. يلزقها ويعرضها  في فايل جميل صباح كل يوم علي الباشا المحافظ ..كان ايامها اللواء ممدوح سالم تقدس سره..لما  صاحبنا يسعده الحظ ..يحط ورد قدام المحافظ .. في الاحتفالات الجاهيريه..لو البليه لعبت معاه يطلع في صوره وهو واقف زي اللطخ ورا الباشا المحافظ..يومها الشقه متعرفش تنام الليل م الفرحه..نسمع اغنية صوره ..صوره لعبدالحليم حافظ..طبعا ده.. حدث تاريخي..  يوم ..يرجع م الشغل مكشر ..ليه .معالي المحافظ جه الصبح وشه مكشر ..لو المحافظ بطنه ماشيه عليه ..دخل دورة الميه تلاقي صاحبنا جاله اسهال وبياخد انتوسيد...

بصفتي طالب بكلية تجاره ..فاضيين ..صيع نسمع له..لكن المسكين بتاع هندسه قسم كهربا ..متفوق..مش فاضي لحكاوي ملة اهله..--ارجوك ابعد عني مش فاضي لك..

لغاية مايوم ..دخل الباشموظف علي زميلنا بتاع هندسه ..اوضته حيحكي..حدوتة الباشا المحافظ..حيكمل.. الواد بتاع هندسة  شخط فيه..--كفايه ملعون ابوك لابو المحافظ لابو اللي يعرفه ابعد عني..انفعل المستوظف..تلعن ابو الباشا المحافظ..حاوريك..وحادبك ميري وملكي ..قوم بعيد عنكم  طارش الطالب بوكس  ..كسر نضارته..سحبه ع الارض..بايديه ورجليه،.هات ياضرب م اللي يحبه قلبك ( المنوفي صحته حلوه  )..--تشتم ابوالباشا ياواطي يابن الكلب..انا مسامحك في لعنة ابويا لكن ابو الباشا..لا..لا..

 نسيت اقولكم..الحي الراقي اللي احنا سكانه..كان  احسن وارقي طبقه تسكنه كمسارية شركة اتوبيس الصعيد..حراميه بجداره..الحي يعمل حسابهم ..كلهم بلدياتنا واولاد عمنا من محافظة قنا (هنا تظهر النزعات القبلية والعنصرية!! )..لاجل حظ المنوفي التعيس ..احدهم سمع صرخة بلدياتنا المهندس..كما سمع الخليفه المعتصم صرخة المراه العربيه في عموريه تنادي وامعتصماه..فلبي النداء..ودخل الشقه..وبيده تابلوه تذاكر الاتوبيس..خشب طوله نص متر..ليس صغيرا ..كتابلوه كمسارية القاهره..بدون تفاهم اخبط ..رزع المستوظف خبطتين ف الدماغ..خلي صالة الشقه دم وفزلين من شعر الجاني الاسوداللميع..هات ياضرب..تضرب سيدك يافلاح (لفظ فلاح شتيمة في الصعيد )..ايامها الصعايده لهم قيمه وتمن..لوصعيدي اجوز واحده من بحري يتقال عليه علي سبيل المعايره ..جوز الفلاحه..وولاده.. عيال الفلاحه..ينظر اليهم نظره دونيه..قبل ان يحكمنا فلاحين بحري ويدلدلوا رجليهم..

نرجع لموضوعنا ..المهندس..قام -- حرام عليكم ..كفايه..

المضروب طلع يجري ..ركب اول عربية كارو قابلته ..ع المستشفي تقرير ..بعده قسم الشرطه .. بالليل اجتمع اللوبي القناوي بمحافظة اسيوط..اللي له صاحب بالقسم..اللي يعرف دكتور في المستشفي الاميري..بعضهم له علاقه بابن محافظة قنا..المقدم عبدالمنعم عوض..مفتش المباحث العامه باسيوط.. امن الدوله اسمها كده ايامها..كلموه قال: كويس وضبتوه..ولالسه عاوز يستوي زياده -- ربنا يخليك ياواد العم..مخلينك للكبيره ..طيب خلي المهندس يروح المستشفي ..انا موصيهم هناك ..صاحبنا الموظف واقف الصبح علي باب المحافظه : ياسيادة المحافظ ضربوني..--مين انت؟؟!! ..دماغه ووشه ودراعه مربطوين بالشاش -- اعمل لك ايه امشي من هنا ..روح القسم..

التقارير الطبيه وصايه ..الموظف اسبوع علاج..المهندس ٢١ يوم علاج..بلوكامين قسم الشرطة ..الكمساريه بعتوا له اتنين كيلو لحمه من لحمة البداري اللي ترد الروح..

في القسم..الطالب علي كرسي مستريح..الموظف ..--اقف بعيد يامتهم ..

ده من تاثير لحمة البداري علي ح  الصول ..--معاك شهود يامتهم ؟؟ يرد المتهم: مفيش ..

طبعا احنا ذمتنا استك منه فيه..وكيل النيابه ..الطالب ..افراج من سراي النيابه..بتاع المحافظ..اربعة ايام ويراعي التجديد.. طلع بعدهم القمل يسرسب من مناخيره وودانه  وعنيه ..المهم الموضوع خلص..

 بعدها كنت  اسال المنوفي : اخبار الباشا المحافظ ايه.؟؟!! .يجري و.يقول : انا مالي ..ملعون ابوه ابن كلب...

مش بقولكم المتغطي بالحكومه عريان..